برۆکلی و قەرنابیت هەردووکیان دەوڵەمەندن بە ماددە خۆراکیەکان و دژە ئۆکسێنەرەکان و هەریەکەیان سوودی تایبەتی خۆیان هەیە کە وایکردووە زیادکردنێکی گرنگ بێت بۆ خۆراک.

لە ماڵپەڕی "eremnews" بڵاو کراوەتەوە، برۆکلی هەڵبژاردەیەکی خۆراکی نایابە بەهۆی دەوڵەمەنی بە ماددە خۆراکییەکانییەوە کە ٣١ گرام کالۆری، ٢ گرام پرۆتین ، ٦ گرام کاربۆهیدرات، ٢ گرام ڕیشاڵی تێدایە هەروەها دەوڵەمەندە بە ڤیتامین Cو K بە ڕێژەیەکی زیاتر لە پێویستی ڕۆژانە، ئەمە جگە لە مەنگەنیز و فۆلیک ئەسید و ڤیتامین A کە تەندروستی چاوەکان باشتر دەکەن و سیستمی بەرگری جەستە بەهێز دەکەن.

بەڵام قەرنابیت کالۆری کەمترە، ٢٧ گرام کالۆری تێدایە، لەگەڵ هەمان بڕی پرۆتین و ڕیشاڵ کە لە برۆکلیدا هەیە، هەرچەندە بڕێکی کەمتر لە ڤیتامینەکانی Aو C و K لەخۆدەگرێت، بەڵام پۆتاسیۆمی زیاتر تێدایە، هەڵبژاردەیەکی زۆر باشە بۆ ئەوانەی دەیانەوێت ڕێجیم بکەن و بڕێکی کەم کاربۆهیدرات بخۆن.

سەرەڕای جیاوازی نێوانیان، هەردوو جۆرەکە دەوڵەمەندن بە دژە ئۆکسێنەر کە بەشدارن لە کەمکردنەوەی ڕەقبوونی خوێنبەرەکان و باشترکردنی تەندروستییان، برۆکلی ڕێژەیەکی زیاتر لە ڤیتامین و ماددە خۆراکیەکان دابین دەکات، لە کاتێکدا قەرنابیت بە دژە ئۆکسێنەری تایبەت وەک گلوکۆسینۆلات تایبەتمەندە، کە خوێنبەرەکان بەهێز دەکات.

بۆ ئەوەی سوود لە سوودە جیاوازەکانیان وەربگریت، باشترە برۆکلی و قەرنابیت پێکەوە بخەیتە ناو خۆراکی هەفتانەتەوە نەک بەراوردیان بکەیت بۆ بەدەستهێنانی هاوسەنگییەکی خۆراکی نایاب و تەندروستییەکی باشتر.