هێلکە خۆراکێکی بەناوبانگە، بە بەها خۆراکییە بەرزەکەی دەناسرێتەوە، سەرچاوەیەکی دەوڵەمەندە بە پرۆتین و ڤیتامین و کانزاکان.

لە ماڵپەڕی " lebanon24" بڵاو کراوەتەوە، زۆر کەس پرسیاری ئەوە دەکەن "کەی باشترین کاتە بۆ خواردنی هێلکە، بەیانیان یان ئێواران؟"

یەک هێلکە نزیکەی ٧٥ کالۆری و ٦ گرام پرۆتین و ٥ گرام چەوری تێدایە، ئەمە جگە لە جۆرەها ڤیتامین و کانزا، وەک ڤیتامین A وB12.

خواردنی هێلکە لە بەیانیاندا بژاردەیەکی نایابە، یارمەتیدەرە بۆ ئەوەی بۆ ماوەیەکی زۆر هەست بە تێری بکەیت ئەمەش ئارەزووی خواردنی کەم و ناتەندروست پێش نانخواردنی نیوەڕۆ کەمدەکاتەوە هەروەها تەندروستی مێشک بەرز دەکاتەوە و و یادەوەری باشتر دەکات، ئەمەش وایکردووە ببێتە هەڵبژاردەیەکی خۆراکی جیاواز بۆ دەستپێکردنی ڕۆژەکەت بە وزەوە.

سەبارەت بە خواردنی هێلکە لە ئێواراندا، بە سودە بۆ وەرزشوانان، بەو پێیەی یارمەتیدەرە لە چاککردنەوە و گەشەکردنی ماسولکەکان بەهۆی دەوڵەمەندی بە پرۆتین، هێلکە یارمەتیدەرە بۆ خەوێکی قوڵ چونکە ترشی ئەمینی تریپتۆفان لەخۆدەگرێت کە بەشدارە لە بەرهەمهێنانی میلاتۆنین کە خولی خەو و بەئاگابوونەوە ڕێکدەخات.

پسپۆران ئاماژە بەوە دەکەن دەتوانیت لە هەر کاتێکدا لە ڕۆژدا هێلکە بخۆیت، بەپێی پێویستی خۆت، بەیانیان بۆ زیادکردنی وزە و تەرکیزە، ئێوارانیش بۆ پاڵپشتی چاکبوونەوەی ماسولکەکان و خەوتنێکی ئارامە.