شوێنەوارناسان بەشێک لە دەفرێکی گەورەیان دۆزیەوە کە تەمەنی شەش هەزار ساڵە لە ئێستادا لە مۆزەخانەی " Kirillo-Belozersky" داندراوە.

بەگوێرەی ماڵپەڕی " tvbrics" ئەم دەفرە بوونی نیشتەجێبوونی سەردەمی بەردینە نوێیەکان لە شوێنی گەورەترین کڵێسەی ئۆرتۆدۆکسییەکان لە ئەوروپا پشتڕاست دەکاتەوە.

لێکۆڵینەوەکان دەریدەخەن کە ئەم شوێنەوارە دەگەڕێتەوە بۆ کۆتاییەکانی سەردەمی بەردینە نوێیەکان و پێدەچێت لە نیوەی دووەمی هەزارەی چوارەمی پێش زایین دروستکرابێت.

میخائیل چارۆمازۆڤ بەڕێوەبەری مۆزەخانەکە دەڵێت " مێژووەکەی دەگەڕێتەوە نیوەی دووەمی هەزارەی چوارەمی پێش زایین، واتە تا سەردەمی بەردینە نوێیەکان لە کاتی گەڕان و هەڵکەندندا ئەم پارچە سیرامیکییە دۆزراوەتەوە"

ئاماژەی بەوەش کرد کە ئەم دۆزینەوە پشتڕاستی دەکاتەوە کە ئەو ناوچەیەی " Kirillo-Belozersky" لەسەر دروستکراوە، زیاتر لە شەش هەزار ساڵ لەمەوبەر گونجاو بووە بۆ نیشتەجێبوون هەروەها ئەو مادانەی زانایان دۆزیویانەتەوە، بوونی نیشتەجێبوون لەم ناوچەیە لە سەردەمی بەردیندا پشتڕاست دەکەنەوە.

تیرەی قاپەکە نزیکەی ٦٠ سانتیمەرە و بەرزییەکەی ٤٠ سانتیمەترە، بەپێی وتەی شوێنەوارناسانیش ئەو دەفرە بۆ هەڵگرتنی بەرهەمە جیاوازەکانی وەک دانەوێڵە، گۆشت، ماسی بەکارهێنراوە، بەو پێیەی دانیشتوانی ناوچەکە چالاکانە خەریکی ڕاوکردن و ماسیگرتن بوون یان ڕەنگە دەفرەکە بۆ چێشت لێنان بەکارهاتبێت جێگەی باسە پێویستی بە لێکۆڵینەوەی زیاتر دەبێت بۆ ئەوەی بە تەواوی بزانرێت چۆن دەفرەکە بەکارهێندراوە.