توێژینەوەکانی ئەم دواییە ئاماژە بەوە دەکەن زەیتی ماسی دەوڵەمەندە بە ترشی ئۆمیگا ٣ کە سوودی بەرچاوی هەیە لە چارەسەرکردنی هەندێک لە کێشەکانی پێست.

بەپێی ماڵپەڕی "Medical News Today" زەیتی ماسی پاڵپشتی کاری دڵ و مێشک دەکات و باری دەروونی باشتر دەکات و پارێزگاریی لە ئێسک و جومگەکان دەکات هەروەها هەوکردن ناهێڵێت و تەندروستی پێست باشتر دەکات، بۆ ژنانی دووگیان بەسوودە و هاندەر دەبێت بۆگەشەی کۆرپەلە و باشکردنی ماوەی دووگیانی.

ترشە چەورییە تێرنەکراوەکانی وەک ترشی ئیکۆساپێنتاینۆیک (EPA) و ترشی دۆکۆساهێکساینۆیک (DHA) لە زەیتی ماسیدا هەیە کە یارمەتی پاراستنی هاوسەنگی و ئاودانی خانەکانی پێست دەکات و بەم شێوەیە تەندروستی پێست باشتر دەکات، زەیتی ماسی ڕێگری لە تیشکی سەروو بنەوشەیی دەکات و چاکبوونەوەی برینەکان خێراتر دەکات.

توێژینەوەکان ئاماژە بەوە دەکەن کە زەیتی ماسی هەوکردن کەمدەکاتەوە، ئەمەش یارمەتیدەر دەبێت لە دواکەوتنی نیشانەکانی پیربوون، هەروەها ئەم زەیتە ڤیتامینە گرنگەکانی تێدایە وەک ڤیتامین A کە کاریگەری ئەرێنی لەسەر پێست دروست دەکات.

پسپۆران باس لەوە دەکەن تەواوکەری ئۆمیگا ٣ یان زەیتی ماسی لە ماوەی ١٠ هەفتەدا زیپکەکان کەمدەکاتەوە ، لە حاڵەتی ئەکزیمادا کە حاڵەتێکی باوی هەوکردنە و بە خوران و سووربوونەوە و وشکبوونەوە دەناسرێتەوە، توێژینەوەکان دەریانخستووە کە ڕەنگە EPA و DHA ڕێگری لە هەوکردن بکەن و نیشانەکانی کەم بکەنەوە.

جێگەی باسە لەگەڵ ئەو سوودانەیدا نابێت زیادەڕەوی لە خواردنی زەیتی ماسیدا بکرێت، پێویستە بەپێی رێنماییە پزیشکییەکان بخورێت.