دکتۆر ئۆکسانا میخالێڤا، پسپۆڕی هەناو و خۆراک، دووپاتی کردەوە کە هەنار تایبەتمەندی تەندروستی ناوازەی هەیە و دەتوانێت لە ئەگەری زۆر نەخۆشیدا سوودی هەبێت.

بە گوتەی ئەو وەک لە "روسیا تودەیـ"ـدا هاتووە، "هەنار چەندین پێکهاتەی چالاکی بایۆلۆژی تێدایە و سەرنجی زانا و توێژەرانی راکێشاوە."

ئەو دەڵێت: "ئەنجامی توێژینەوە زانستییە جیاوازەکان ئاماژە بەوە دەکەن کە هەنار تایبەتمەندییەکی بەهێزی دژە ئۆکسێنەر و دژە ڤایرۆس و دژە شێرپەنجەی هەیە، سوودی هەیە دژ بە نەخۆشییەکانی دڵ و خوێنبەرەکان، نەخۆشییەکانی ناوپۆشی جەستە، رۆماتیزم و تەنانەت وەرەم و نەخۆشییەکانی ناو دەم و ددان هەروەها کاریگەری ئەرێنی لەسەر بارودۆخی پێست هەیە."

ئەو پزیشکە ئاماژەی بەوەدا کە دەکرێت دەنکی هەناری تازە لەگەڵ ناوکەکەی بخورێت، چونکە ریشاڵی خۆراکی تێدایە، ئەمەش سوودەکانی هەنار و بەها خۆراکیەکەی زیاد دەکات، ریشاڵی خۆراکی کە زۆرجار لە خۆراکی زۆر کەسدا کەمی هەیە، چەندین سوودی هەیە، لەوانە رێگریکردن لە شێرپەنجەی ریخۆڵە، لابردنی ماددە زیانبەخشەکان لە جەستە و باشترکردنی کارکردنی کۆئەندامی هەرس.

ئەو پزیشکە دووپاتی کردەوە کە تەنها ناوکی نەرمی هەناری تازە دەتوانرێت بخورێت، چونکە ناوکی رەق زیان بە پەردەی گەدە و ریخۆڵەکان دەگەیەنێت، هەروەها پێویستە هەموو کەسێک بزانێت کە هەنار بەتەنها چارەسەری هیچ نەخۆشییەک ناکات، بۆیە کاتێک کێشەیەکی تەندروستی دروست دەبێت، پێویستە راوێژ بە پزیشکی پسپۆڕ بکەیت.