پەردەپڵاو یەکێکە لەو خواردنانەی لە ژەمە سەرەکییەکاندا ئامادە دەکرێت، تامێکی خۆشی هەیە و زۆر کەس ئارەزووی دەکات،

پێداویستییەکان:

یەک کیلۆ برنج

زەیت بەپێی پێویست

بادەم

پەتاتە

بەزالیا

گوێز

کشمیش

قیمە یان سنگی مریشکی کوڵاوی وردکراو

بەهاراتی پەردەپڵاو

نانی پاقلاوە

خوێ بەپێی پێویست

ئاو بەپێی پێویست

شێوازی ئامادەكردنەکەی:

سەرەتا بادەمەکە لەناو ئاوی گەرم دابنێ یان بیخە سەر ئاگر بۆ ئەوەی بەرگەکەی بە ئاسانی لێبکرێتەوە.

بادەم، بەزالیا، پەتاتە، کشمیش، گوێز و قیمەکە لەناو تاوەیەکدا سووربکەرەوە و کەمێک بەهاراتی پەردەپڵاو بکە بەسەریدا.

پاشان برنجەکە بکەرە مەنجەڵێکەوە کە رۆنەکەی پێشتر قرچابێت، دواتر بڕێک ئاوی گەرم و خوێی تێبکە.

دوای هەڵچنینی ئاوەکەی ئاگرەکە کز بکە و سەری داپۆشە، دوای نیو کاتژمێر لەسەر ئاگر دایبگرە.

نانی پاقلاوەکە بهێنە، چەوری بکە و بیخەرە ناو دەفری فڕنەکەوە و ریزێک برنج بخەرە سەری، ریزی دووەم کەرەستە سوورکراوەکان دابنێ، بۆ چەند چینێک برنج و کەرەستە سوورکراوەکان بە ریز دابنێ.

پارچەیەکی تر نانی پاقلاوە بکە بە سەریدا و بیخەرە فڕنەکەوە، دوای نیو کاتژمێر لەناو فڕنەکە دەریبهێنە، لەگەڵ شلەی فاسۆلیا و سەوزەدا پێشکەشی بکە.

S.A