کفتە یەکێکە لە خواردنە بە تام و خۆشەکان، زۆر کەس ئارەزووی دەکات، لێرەدا شێوازی ئامادەکردنەکەی دەخەینەروو

پێداویستییەکان:

یەک کیلۆ قیمە

نیو کەوچک خوێ

یەك پیازى وردکراو

نیو کەوچک بیبەرى ڕەش

یەک کیلۆ برنج

یەک دەسک کەرەوزی وردکراو

ڕۆن

دۆشاوی تەماتە

زەردەچەوە

دەسکێک سڵقی وردکراو

کشمیش و بادەم و گوێز

ئاو

ئامادەکردنەکەی:

سەرەتا برنجەکە بۆ ماوەی یەک کاتژمێر دەخوسێنیت.

پیازەکە لەناو ڕۆنەکەدا کەمێک سوربکەرەوە و قیمەکەی تێبکە دوایی کەرەوز و دۆشاوی تەماتە و پێکهاتەکانی تری تێکەڵ بکە تا پێکەوە جوان سوردەبنەوە، دواتر لەسەر ئاگر دادەگیرێت و دایدەنێت تا سارد دەبێتەوە.

کە برنجەکە ئاوەکەی هەڵچنی جوان بیشێلە پاشان بەشێکی کەم لە قیمەکەی تێکەڵ بکە و هەڵیبشێلە تا دەبێتە هەویر و تێکەڵ بە یەک دەبێت دواتر پارچەی خڕ خڕی بکە، بە پێی پێویستی پارچەکان پێکهاتەکانی بکەرە ناو، لەگەڵ خڕکردنی دەست بە کەمێک ئاو تەڕبکە تاوەکو بەدەستەوە نەنوسێت و هەڵنەوەشێت.

بۆ دروستکردنی شۆرباکەی دەبێت سڵقە وردکراوەکان لەناو مەنجەڵێکدا بە ڕۆن سووری بکەرەوە، پاشان دۆشاوی تەماتە و خوێ و ئاوی تێدەکەیت، دوای ئەوەی پێکەوە کوڵان وردە وردە کفتە ئامادەکراوەکانی تێدەکەیت و سەری دادەپۆشیت.

بۆماوەی زیاتر لە ٣٠ خولەک لەسەر ئاگرێکی مامناوەند دایدەنێت تا بە باشی پێکەوە دەکوڵێن، پاش کوڵانی لەسەر ئاگر دادەگیرێت و پێشکەشی دەکەیت.