هەر سێ هونەرمەندی گۆرانیبێژ سەمیرە کارزان و رێباز شەمامی و ئەفشین شوکری دوێتی "سەرگەردانم بێ تۆ"ـیان بڵاوکردەوە.

بەرهەمەکە لە تێکست و ئاوازی رێباز شەمامییە و کاری ئەرەنجمێنتی لەلایەن ئەفشین شوکرییەوە بۆ ئەنجامدراوە، کاری میکس و ماسترینگ رەزا پور رەزاوی ئەنجامیداوە.

سەمیرە کارزان لەدایکبووی شاری بۆکانی رۆژهەڵاتی کوردستانە، ماوەیەکی کەمە لە بواری هونەرییدا دەرکەوتووە و چەند بەرهەمێکی تایبەت بەخۆی هەیە، زیاتر بە گۆرانی "دکتۆر" ناوبانگی پەیداکردووە، هەروەها هاوسەری رێباز شەمامییە.

رێباز حسێن ناسراو بە ڕێباز شەمامی ساڵی ١٩٨٥ لەدایکبووە،‎زیاتر لە ١٥ ساڵە کاری هونەری دەکات، هەرچەندە خۆی خەڵکی سەردەشتی ڕۆژهەڵاتی کوردستانە، بەڵام لە شاری شیراز لە وڵاتی ئێران دەژی، زیاتر لە ٥٠ بەرهەمی فارسی و ٥٠ بەرهەمی کوردی هەیە.

ئەفشین شوکری، لەدایکبوی شاری مهابادی رۆژهەڵاتی کوردستانە، ماوەیەکی زۆرە کاری هونەری دەکات و خاوەنی چەندین ئەلبوم و بەرهەمی جیایە، بەزمانی کوردی و فارسی و تورکی، ئاوازی بۆ زۆر لە هونەرمەندە دیارەکانی کوردستان داناوە، لەهەمانکاتدا دوێتی لەگەڵ چەند هونەرمەندێکی دیاردا هەیە.