خواردنێکی ئێرانییە و ناوبانگێکی زۆری هەیە، بەشێک لە کابانەکانی ماڵ ئارەزوو دەکەن شێوازی ئامادەکردنەکەی بزانن، کە لێرەدا خراوەتە روو:

کەرەستەکانی:

گۆشتی سوور

سەوزە کە پێکهاتووە لە کەوەر و کەرەوز و گژنیژ و شمڵی "بە ئامادەکراوی لە دوکانەکاندا هەیە"

لۆبیایی سوور یان فاسۆڵیای سوور

پیاز یەک دانە

خوێ، بیبەری ڕەش و زەردەچەوە بەپێی پێویست

چوار دانە لیمۆ بەسڕایی

رۆن

ئامادەکردنەکەی:

سەرەتا لۆبیاکە لە مەنجەڵێکدا بەجیا دەکوڵێنرێت، دواترئاوەکەی دەڕێژرێت، پاشان پیازەکە ورد دەکرێت، بەشێوەی زۆر بچووک و لەناو رۆندا سوردەکرێتەوە و گۆشتەکەی بۆ زیاد دەکرێت.

لەدوای هەڵکزانی گۆشتەکە بیبەری رەش و زەردەچەوە و خوێی تێدەکرێت، ئاوی تێدەکرێت و سەری دادەپۆشرێت، پاش ئەوەی گۆشتە تا ئاستی نیوە کوڵان بوو لۆبیاکەی بۆ زیاد دەکرێت.

بۆ ئامادەکردنی سەوزەکە، سەوزەکە دەکرێتە تاوەیەکەوە و ڕۆنی تێدەکرێت، هیچ کات سەرەتا هەموو ڕۆنەکە مەکە تاوەکەوە، لەبەرئەوەی سەوزەکە هەمووی هەڵدەمژێت، دەبێت لەگەڵ سووربوونەوەی کەم کەم ڕۆنی بۆ زیاد بکرێت،خوێی تێدەکرێت، لە دوای سوربوونەوەی دەکرێتە ناو گۆشت و لۆبیاکەوە و لیمۆ بەسراییەکەشی تێدەکرێت، بەپێی پێویست ئاوی بۆ زیاد دەکرێت و ئاگرەکەی کز دەکرێت، کە کوڵا ئامادەی خواردن دەبێت.