ژەمی پارشێو لە مانگی ڕەمەزاندا بایەخێکی تایبەتی هەیە، بەتایبەتی لە ئێستادا بەهۆی ئەوەی کاتەکانی رۆژ زۆرە و کاتێکی زۆر بەڕۆژوودەبن، هەر بۆیە لە پارشێودا ژەمێک نان دەخورێت بۆ ئەوەی هەست بە تینوویەتی و برسێتی نەکەن.

پسپۆڕێکی بواری خۆراک بەناوی مەیسا عوسمان لەڕێگەی پێگەی "hiamag" باس لە باشترین جۆری خۆراک دەکات بۆ ژەمی پارشێو لە ڕەمەزاندا بۆ ئەوەی تەندروستی جەستەت گونجاو بێت و هەم کێشیش زیاد نەکات و کاریگەری نەرێنی نەبێت.

ئەو خواردنانەی دەوڵەمەندن بە پڕۆتین و سەرچاوەی سەرەکین وەک هێلکە و پەنیری کەم چەوری و پاقلەی فولی سودانی و جۆرەکانی، چونکە بۆ ماوەیەکی زۆر تێر دەکات و وزە دەدات بە جەستەت، بەڵام هێلەک بە کوڵاوی باشترە.

ئەو خواردنانەی سەرچاوەی سەرەکی ماددەی ریشاڵیەکان و کاربۆهێدراتی تەندروستن، چونکە بۆ ماوەیەکی زۆر هەستی تێریت پێ دەبەخشێت و کەمێک درەنگ هەرس دەبێت وەک شۆفان و نانی بۆر و پاقلەمەنییەکان وەک نیسک و پاقلە.

ماست باشترین ژەمی پارشێوە، چونکە دەوڵەمەندە بە کالسیۆم و پڕۆتین و ڤیتامین، هاوکات بەکتریای سودبەخش لە گەدەدا دروست دەکات کە بۆ کرداری هەرس بەسوودە و یارمەتی دەدات زوو تینوو نەبیت.

سەوزەوات بەهۆی ئەوەی بڕێکی زۆر ئاوی تێدایە یارمەتی جەستەت دەدات و قەرەبووی ئەو شلەمەنیەی جەستەت دەدات کە لە کاتی رۆژوودا دەڕوات، هاوکات رێگا نادات قەبز بیت وەک خەیار و تەماتە و کاهو.

ر.ئ