باڵی مریشک یەکێکە لەو بەشانەی مریشک کە خواستێکی زۆری خەڵکی لەسەرە و زۆرکات بۆ برژاندن ئامادەدەکرێت، بە تایبەت لە گەشت و چونەدەرەوەکاندا، بەهۆی ئەوەی تامێکی خۆشی هەیە، یەکێک لەو خۆشکردنانەی پەسەندە و تامێکی خۆش دەبەخشێت بەبەکارهێنانی رووبەهەنارە.

شێوازەکانی خۆشکردنی خۆراکەکان زۆرن و هەر کەسێک بە شێوەیەک پێی پەسەندە و چێژی لێ وەردەگرێت بەڵام یەکێک لەشێوازەکان کە تامێکی خۆشه دەبەخشێت بەم شێوەیەیە:

کەرەستەکان:

۱/۲نیو کیلۆ باڵی مریشك

کەوچکێکی زەڵاتە خوێ

کەوچکێکی چێشت زەیتی زەیتوون

سێ کەوچکی چێشت ڕوبەهەنار

ئاوی لیمۆیەک

کەوچکێکی چا لیمۆندزی

ئامادەکردنەکەی:

سەرەتا باڵەکان جوان دەشۆرێتەوە و خاوێن دەکرێتەوە و دەکرێتە سوزگییەکەوە بۆ ئەوەی ئاوەکەی بچۆڕێتەوە پاشان لەناو دەفرێکدا هەموو کەرەستەکان جگە لە باڵی مریشکەکە تێکەڵ بکە، بۆ ئەوەی سۆسەکەی ئامادەببێت و باڵەکان بکەرە ناو سۆسەکەوە و بۆ ماوەی دوو کاتژمێر یان زیاتر لەناو ساردکەرەوەدا دایبنێ، دواتر بە فڕن یان لەسەر خەڵوز بیبرژێنە و لەگەڵ نان و دۆ پێشکەشی بکە.

جێگەی ئاماژەیە بەپێی زیادبوونی بڕی باڵەکە پێویستە کەرەستەکان زیادبکرێت.

ئ.ل