پسپۆڕێکی تایبەت بە نەخۆشییەکانی ژنان و منداڵبوون ئاشکرایکردووە، خواردنی پیسایی کۆرپەلە لەناو منداڵدانی دایکیدا حاڵەتێکە پێی دەوترێت (Meconium aspiration syndrome – MAS) کە تیایدا کۆرپەلە شلەی ئامنۆتیک و پیسایی خۆی هەڵدەمژێت و دەچێتە ناو سییەکانی کۆرپەلە لە پێش کاتی لە دایکبووندا یان لە کاتی لە دایکبووندا.

چرۆ حسێن عەزیز پزیشکی پسپۆڕی نەخۆشییەکانی ژنا و منداڵبوون و نەزۆکی لە پەڕەی فەرمی خۆی لەفەیسبووک ئاماژەی بەوەکردووە، بە گشتیی لە ٥-١٠٪ کۆرپەلە تووشی ئەم حاڵەتە دەبنەوە و دەکرێت ببێتە هۆی چەندین نەخۆشی لە کۆرپەلە و لە حاڵەتە مەترسیدارەکانیدا ببێتە هۆی مردنی کۆرپلەکە، ئەو هۆکارانەی وادەکەن کۆرپەلە لە سکی دیکیدا پیسایی بخوات بەمجۆرە روونیکردووەتەوە:

یەکەم: زیادبوونی ماوەی دووگیانی بەتایبەت ئەگەر هاتوو لە ٤٢ هەفتە زیاتر بوو، ئەمەش وا دەکات وێڵاش نەتوانێت چیتر بە باشی کردارەکانی خۆی جێبەجێ بکات.

دووەم: لە دایکبوونی کۆرپەلە بە کێشی کەم و بەباشی گەشە نەکردنی لە منداڵدانی دایکیدا.

سێیەم: زۆری کاتی لە دایکبوونی کۆرپەلە.

چوارەم: کەمبوونی بڕی ئەو ئۆکسجینەی کە بۆ کۆرپەلەکە دەچێت.

پێنجەم: توشبوونی دایکەکە بە هەندێک نەخۆشی لە ماوەی دووگیانیدا وەک: بەرزی فشاری خوێن، نەخۆشی شەکرە.

شەشەم: جگەرە کێشان.

سەبارەت بە نیشانەکانی ئەو کۆرپەلانەی پیساییان خواردووە ئەو پزیشکە روونیکردووەتەوە نیشانەکان بریتین لە:

یەکەم: شینبوونەوەی پێست.

دووەم: کەمبوونەوەی تێکڕای لێدانی دڵ.

سێیەم: بوونی کێشەی هەناسەدا.

چوارەم: لاوازی لەشی منداڵە تازە لە دایکبووەکە.

پێنجەم: هەڵئاوسانی سەر سنگی منداڵەکە.

چرۆ حسێن بۆ چارەسەری ئەم حاڵەتی کۆرپەلە نوسیوویەتی، چارەسەری ئەو کۆرپەلانەی کە پیساییان خواردووە بەندە لەسەر بڕ و چڕی ئەو پیساییەی خووراوە، هەتا چەند کۆرپەلەکە توانای هەناسەدانی هەیە لەگەڵیدا ماوەی چەند بەسەر خواردنی پیساییەکەدا تێپەڕیووە، بەگشتی پزیشکان ئۆکسجینی دەستکرد یان دژە زیندەییەکان بەکاردەهێنن بۆ چارەسەری ئەم حاڵەتە.

ئ.ل