نیسک یەکێکە لە بەناوبانگترین جۆری بەرهەمە پاقلەمەنییەکان و بڕێکی زۆر کانزا و پڕۆتینی تێدایە و باشترین خۆراکە بۆ وەرزی زستان، چونکە گەرمی بە جەستە دەبەخشێت و تامێکی خۆشی هەیە و تەندروستە و سوودێکی زۆر بە جەستە دەگەیەنێت.

ماڵپەڕی "الیوم السابع" لە بابەتێکی تەندروستیدا کۆمەڵێک سوودی نیسکی بۆ تەندروستی جەستە ئاشکراکردووە، بەم جۆرە:

یەکەم: نیسک بڕێکی زۆر پێکهاتەی ڕیشاڵی تێدایە، هۆکارێکە کە کاردەکات بۆ کەمکردنەوە ئاستی کۆلیسترۆلی خوێن، دڵ و خوێنبەرەکان لە نەخۆشی دەپارێزێت.

دووەم: لەلایەکی دیکەوە نیسک دەوڵەمەندە بە بڕێکی زۆر لە کاربۆهێدراتی بەسوود کە دەبێتە هۆی باشکردنی کرداری هەرس، لەهەمانکاتدا ئاستی شەکری خوێن رادەگرێت.

سێیەم: خواردنی نیسک دەبێتە هۆی چارەسەرکردنی قەبزی و بۆ ماوەیەکی زۆر تێرت دەکات و ناهێڵێت زۆر برسی بیت و رزگاردەکات لە کێشی زیادەی جەستە.

چوارەم: نیسک توانای هەیە مەترسیەکانی نەخۆشی شێرپەنجەی مەمک کەمبکاتەوە، چونکە بڕێکی زۆر فلاونیسی تێدایە کە پێکهاتەیەکی دژە ئۆکسانە.

پێنجەم: ترشی فۆلیک و مەگنیسۆم دوو پێکهاتەی سوودبەخشن و ئاستی ماددەی هوموسیسیتین کەمدەکەنەوە، کە ماددەیەکی مەترسیدارە بۆ دڵ و خوێنبەرەکان، لەهەمانکاتدا مەگنسیۆم خوێن چالاک دەکات و ئۆکسجینی پێویستە دەدات بە جەستە.

شەشەم: نیسک دەوڵەمەندە بە ئاسن، جەستە پێویستی پێیەتی بۆ بەرهەمهێنانی هیمۆگلۆبینی خوێن.

حەوتەم: پۆتاسیۆم یەکێکە لە کانزا بەسوودەکانی نیسک بۆ جەستە، لەهەمانکاتدا سەرچاوەی سەرەکی ڤیتامینەکانە بەتایبەت ڤیتامین B3 کە رۆڵێکی گرنگ و کاریگەری هەیە لەسەر مێشک.

هەشتەم: خواردنی نیسک دەبێتە هۆی کەمکردنەوەی تووشبوون بە نەخۆشیەکانی زەهایمەر و بەهێزکردنی ئاستی بینین و دژی نەخۆشیەکانی هەوکردنی ئێسک و شەکرەیە، دەتپارێزێت لە نەخۆشیەکانی شێرپەنجە و بەرگری جەستەت بەهێزدەکات.

ر.ئ