خەوتن باشترین جۆری پشوو وەرگرتنە بۆ جەستە، بەڵام زۆرکات بەبێ ئەوەی هۆکارەکەی بزانین لەدوای لەخەو هەستان، ئازاری شان و مل دروست دەبێت و دەبێتەهۆی بێزارکردنمان.

د . هه‌ڤین که‌مال شاه محمد پسپۆڕ له‌ زانستی ئازار و به‌نج لەبارەی ئازاری شان و مل لەدوای لەخەو هەستان بەم شێوەیە هۆکارەکانی دروست بوونی ئەو ئازارەی خستەڕوو:

لەوانەیە زۆر بیرت لە شێوازی جەستەت نەکردبێتەوە لەکاتی خەوتندا، یاخود ئەو  سەرین (بالیفە)ی بەکاریدەھێنیت، بەلام ئەم دووانە دوو ھۆکاری گرنگن بۆ دروستبوونی مل ئێشە، ھەروەھا دەبنە ھۆی پشت ئێشە و ئازاری جۆراوجۆری تریش.

توێژینەوەکان دەڵێن  تێکچوون و کێشەی خەو بە ڕێژەی ٥٪ سەرچاوەی ئازاری بەردەوامن. زۆربەی ئەم ھۆکارانە دەتوانن کۆنتڕۆڵ بکرێن، ھەربۆیە گۆڕینی ھەندێک خووی  خەوتن یاریدەدەرە بۆ کۆنتڕۆڵی ئازاری شان ومل .

ھۆکارەکان:

- شێوازی خەوتن: خەوتن لەسەردەم ھۆکارێکی گرنگە بۆ ئازاری مل،  ملت لەوانەیە بەیەک لادا بکەوێت بۆ چەند کاتژمێرێک،  کە کاریگەری ھەیە لەسەر ماسولکەکانی مل و گرژبوونیان. ھەروەھا کاریگەری خراپیشی ھەیە لەسەر ماسولکەکانی پشت.

- بالیف یاخود سەرین: ھەڵبژاردنی بالیفی تەندروست کە بۆ شان و ملی تۆ گونجاو بێت زۆر گرنگە،  ئەو بالیفەی ھاوسەنگیەکی باش بۆ شان و ملت دروست نەکات، ئەگەری دروستکردنی فشاری ھەیە لەسەر ماسولکەکانی ملت و دروستکردنی مل ئێشە.

- جووڵەی لە پڕ: وەکو ھەستانەسەرپێی لەپڕ یاخود لەکاتی خەودا جوڵاندنی لەپڕی قۆڵەکان ، ئەگەری دروستبوونی مل ئێشە زیاد دەکەن.

- پێکانی پێشووتر: وەکو ڕوودانی وێپلاش (فشار بۆ ەر ماسولکەی مل لەکاتی ڕووداوێکدا)، یاخود پێکانە وەرزشییەکان. لەدوای چەند ڕۆژێک لە پێکانەکە لەوانەیە ھەست بە ئازار بکرێت.

- ھەندێک ھۆکاری تر: وەک شێوازی ھەڵەی وەستان لە ڕۆژدا، کارکردن بۆ ماوەیەکی زۆر لەسەر کۆمبیوتەر و بەکارھێنانی زۆری مۆبایڵ، داخورانی جومگەکانی مل، خزانی دیسکی مل، ھەندێک حاڵەتی نەخۆشی وەکو ڕۆماتیزم ، فایبرۆمایەڵجیا.

لەلایەکی ترەوە ئەو پزیشکە بەم جۆرە باسی لە چارەسەرەکانی ئازاری شان و مل کرد:

-ئەگەر لەسەردەم (لەسەر سک) دەخەویت، ھەوڵ بدە لەسەر لا بخەویت و بالیفێک بخەیتە نێوان ئەژنۆکانت (بە شێوەی منداڵ لەسکی دایکیدا)، دڵنیابەرەوە لەوەی کە بالیفەکە لەژێر سەرتدا بەرزتر نیە وەک لەژێر ملت.

ھەوڵبدە بالیفی پەڕ بەکاربێنیت کەبەئاسانی شێوەی سەر و ملت وەردەگرێت. بەڵام لەبەرئەوەی بالیفی پەڕ زوو تێکدەچێت، باشترە ساڵی جارێک بگۆڕێت و بالیفێکێ نوێ بەکاربھێنرێت، بالیفێکیش  بەکارمەھێنە کە زۆر ڕەق بێت یان زۆر نەرم، بەڵکو با مامناوەند بێت.

- ئەگەر دۆشەکەکەت لەناوەڕاستدا چاڵ بوو، ھەوڵبدە بە زووترین کات بیگۆڕیت، دۆشەکێک بەکاربھێنە کە نە ڕەق بێت نە زۆر نەرم، کەبتوانێت پاڵپشتی ماسولکەکانی پشت و ملت بکات.

- ھەوڵبدە بە ڕۆژ شێوازی وەستان و دانیشتنت تەندروست و ڕاست بێت.

-کاتێک مۆبایڵ بەکاردێنیت ھەوڵبدە لە ئاستی چاوتدا ڕایگریت، بۆ ئەوەی ڕێگری بکەیت لە نوشتانەوەی ملت بگریت، مۆبایلەکەشت لەنێوان شان و گوێتدا ھەڵمەگرە کاتی قسەکردن.

- وەرزش بکە بەشێوەیەکی ڕۆژانە و ڕێک، وەرزشی ڕۆژانە یارمەتی بەھێزکردنی ماسولکەکان دەدات، ئەگەر بۆ ماوەیەکی کەمیش بێت.

- ئەگەر ئازارت بۆ پەیدا بوو، دەتوانیت پاکی سارد بەکاربێنیت، ئەگەر زیاد لەچەند ڕۆژێکی خایاند بیکە بە پاکی گەرم بۆ ماوەی بیست خولەک لەسەر شوێنی ئازارەکە.

- دەتوانیت ھەندێک وەرزشی سادە ئەنجامبدەیت وەکو ؛ ڕۆشتن بەپێ، یۆگا، وەرزش لەناو ئاودا...ھتد، ئەمانە یارمەتی ھاتوچۆی خوێن دەدەن لەناوچەکە، ئازار و گرژی کەمدەکەنەوە، ھیچ کاتێک لەجووڵە مەوەستە، وەستان لەجووڵە گرژی و ئازار زیاد دەکات.

- بەکارھێنانی ئازارشکێن و ماسولکە خاوکەرەوەکان.

- ئەگەر ئەمانە سوودی نەبوو، پێویستە ڕای پزیشکی پسپۆڕ وەربگیرێت.