برینی ناودەم بە هۆکاری هەمەجۆر دروست دەبێت، برین لە ڕووپۆشی ناوەوەی دەمدا دروستدەبێت، هەندێک جار زمان و پوکیش دەگرێتەوە، برینەکە لە شێوەی بڵقی سپیدایە و ئازارێکی زۆری هەیە بەتایبەت لە کاتی خۆراک خواردندا.
ماڵپەڕی " برایت ساید" لە بابەتێکدا هۆکارەکانی دروستبوونی برینی ناو دەم دەخاتەڕوو کە دیارترینیان ئەمانەن:
برینی ناو دەم هەندێک جار بەهۆی بەکارهێنانی فڵچەی ددان شۆردنی نەگونجاو یان فڵچەی ڕەق دروست دەبێت و هەندێک جاریش بەهۆی خواردنی زۆر گەرم ناو دەم توشی برین دەبێت.
هەروەها کەمی ماددەی کانزای ئاسن و ڤیتامینەکان هۆکارن بۆ توشبوونی دەم بە برین، یاخود گۆڕانکاری ئاستی ھۆڕمۆنەکان لە لەشدا بەتایبەتی لە خانماندا پێش سوڕی مانگانە.
پسپۆڕان ئاماژە بەوە دەکەن کە دڵەڕاوکێ و خەمۆکی بە هۆکارێکی سەرەکی دادەندرێت بۆ برینداربوونی بەشی ناوەوەی دەم یاخود توشبوون بە هەوکردن.