شەکیرا بە هەنگاوێکی مرۆڤدۆستانە هەمووانی سەرسام کرد؛ دوای بوومەلەرزە وێرانکەرەکە، هاوکاری بۆ دووبارە دروستکردنەوەی قوتابخانەکانی کۆڵۆمبیا ڕادەگەیەنێت.

خانمە گۆرانیبێژی کۆڵۆمبی، شەکیرا، دەستپێشخەرییەکی بە بڕی ١.٢٥ ملیۆن دۆلار بۆ دووبارە دروستکردنەوەی ئەو قوتابخانانە ڕاگەیاند کە بەهۆی بوومەلەرزەکەی ناوچەکانی کۆڵۆمبیاوە زیانیان پێگەیشتووە. ناوبراو جەختیکردەوە کە وڵاتەکەی بە تەنیا ڕووبەڕووی لێکەوتەکانی ئەم کارەساتە نابێتەوە.

لەژێر ڕۆشنایی ئەم دەستپێشخەرییەدا، ئەم هونەرمەندە سەردانی شاری کیبدۆی پایتەختی هەرێمی چۆکۆی کرد بۆ لەنزیکەوە ئاگاداربوون لە زیانی دامەزراوە پەروەردەیییەکان. هەروەها بەگەڕخستنی بودجەی پڕۆژەکەی بە هاوکاریی چەند لایەنێک ڕاگەیاند، لەوانە: سندوقی جیهانیی "فیفا" بۆ پەروەردەکردنی هاووڵاتییان، کۆمپانیای "لایڤ نەیستن"، و یەکێتیی تۆپی پێی ئەفریقا.

شەکیرا ئاماژەی بەوە کرد کە قوتابخانەکان تەنها بینا نین، بەڵکو سەقامگیری و ڕۆتینی ڕۆژانە بۆ منداڵان دابین دەکەن، بەتایبەتی دوای کارەساتەکان. هاوکات پابەندبوونی خۆی بۆ گەڕاندنەوەی خوێندکاران بۆ سەر کورسییەکانی خوێندن دەربڕی و ڕایگەیاند کە هەوڵەکانی تەرخان دەکات بۆ دووبارە دروستکردنەوەی زانکۆی تەکنەلۆجیی چۆکۆ "دیێگۆ لویس کۆردۆبا"ش، کە یەکێکە لە دیارترین دامەزراوە حکومییەکانی خوێندنی باڵا لە هەرێمەکەدا.

ئەم هەنگاوە دوای ئەوە هات کە بوومەلەرزەکە زیانێکی زۆری بە کەرتی پەروەردە لە چۆکۆ گەیاند و بووە هۆی ڕووخانی دەیان قوتابخانە و زیانگەیشتن بە سەدان دامەزراوەی دیکە. لە کۆتاییدا، شەکیرا هاودەردیی خۆی بۆ ئەو خێزانانە دەربڕی کە منداڵەکانیان لەدەستداوە و بەڵێنیدا بەردەوام بێت لە پشتیوانیکردنی لێقەوماوان.