ئەستێرەی جیهانی ئەنجێلینا جۆلی وردەکاری نوێی سەبارەت بە ژیانی سۆزداریی خۆی ئاشکرا کرد و پشتڕاستی کردەوە کە لەدوای جیابوونەوەی لە هاوسەری پێشووی "براد پیت" لە ساڵی ٢٠١٦ـەوە نەچووەتە هیچ پەیوەندییەکی سۆزدارییەوە. ئاماژەی بەوەش کرد کە سەرنجی تەواوی لە ماوەی دەیەی ڕابردوودا تەنها لەسەر پاراستن و چاودێریکردنی شەش منداڵەکەی بووە.

لە چاوپێکەوتنێکی ڕۆژنامەوانیدا لەگەڵ "یاهۆ ئینتەرتێنمنت" هاوکات لەگەڵ ڕیکلامکردن بۆ فیلمە نوێکەی بە ناوی Couture، جۆلی تەمەن ٥١ ساڵ ڕایگەیاند: "بە ڕاشکاوی بڵێم، لەدوای جیابوونەوەم لە دەیەی ڕابردوودا پەیوەندی سۆزداریم لەگەڵ کەس نەبووە. ئەوە لە مێشکمدا جێگیر بووە کە ئەم لایەنە لە ژیانمدا سەرەکی نییە، چونکە سەرنجم لەسەر منداڵەکانم و خێزانەکەمە".

هەروەها دەشڵێت: "هەست دەکەم پێویستم بەوەیە دیسان بژیمەوە، هەرچەندە وردەکارییەکانی ژیان کەمێک شکاندوومی".

ئەم لێدوانانە لەکاتێکدایە کە پەردە لەسەر یەکێک لە درێژخایەنترین و توندترین شەڕەکانی جیابوونەوە لە هۆڵیوود لادرا، کە نزیکەی هەشت ساڵی خایاند تا واژۆکردنی ڕێککەوتنی کۆتایی لە کانوونی یەکەمی ٢٠٢٤.

ڕاپۆرتەکان لە زاری پارێزەرەکەی جۆلی، "جەیمس سیمۆن" گواستیانەوە کە ئەستێرەکە دوای ئەو ساڵە کارەساتبارانە هەست بە "ماندووبوونێکی زۆر" دەکات و ئێستا بەدوای ئاشتی و چاکبوونەوەدا بۆ خێزانەکەی دەگەڕێت.

لە بەرامبەردا، جۆلی ڕووبەڕووی ڕەخنەی سەرچاوە نزیکەکانی براد پیت بووەوە و تۆمەتباریان کرد بە ئەنجامدانی "هێرشی یەکلایەنە و شێواندنی ڕاستییەکان".

جێگەی باسە براد پیت لە ساڵی ٢٠٢٢ـەوە لە پەیوەندییەکی سۆزداری دایە لەگەڵ نمایشکاری جلوبەرگ بە ناوی "ئینیس دی رامۆن".