هونەرمەندی ئیماراتی، ئەحلام شامسی هۆکاری دەستبەرداربوونی لە خەونی پێکهێنانی خێزانێکی گەورە ئاشکرا دەکات.

ئەو خانمە هونەرمەندە کاردانەوەیەکی بەرفراوانی لە تۆڕە کۆمەڵایەتییەکان دروستکرد، دوای ئەوەی بە شێوازێکی خۆرسکانە باسی لە دیدگای خۆی بۆ ژیانی خێزانی و ئەو ژمارە منداڵە کرد کە هیوای دەخواست بیانیبێتە دنیاوە، و دووپاتی کردەوە کە پێکهێنانی خێزانێکی گەورە هەمیشە بەشێک بووە لە خەون و بیروڕا کەسییەکانی خۆی.

ئەحلام لە لێدوانێکی میدیاییدا، بڕوابوونی خۆی بە گرنگیی خێزانی گەورە و ئەو گەرمی، توندوتۆڵی و پاڵپشتییەی کە لە نێوان ئەندامەکانیدا دابینی دەکات ئاشکرا کرد، ڕوونی کردەوە کە هیوای دەخواست ٦، ٧ یان تەنانەت ٩ منداڵی ببێت، چونکە لە ڕوانگەی خۆیەوە خێزانی گەورە مۆدێلێکی نموونەیی بووە بۆ ژیانی هاوسەری.

ئەو هونەرمەندە ئیماراتییە ئاماژەی بەوە کرد کە ئەم خەونەی بەهۆی بارودۆخێکی تەندروستییەوە نەهاتووەتە دی کە دوای لەدایکبوونی کچە بچووکەکەی پێیدا تێپەڕیوە، بەو پێیەی تووشی هەندێک لێکەوتەی تەندروستی ببوو کە وای لە پزیشکەکان کردووە ئامۆژگاری بکەن دووبارە دووگیان نەبێتەوە لەپێناو پاراستنی سەلامەتیی خۆیدا، ئەمەش ڕێگر بوو لە بەدیهاتنی ئارەزووەکەی بۆ بوونی ژمارەیەکی زیاتری منداڵ.

ئەحلام ئاماژەی بەوەش کرد کە خۆشەویستیی ئەو بۆ خێزانی گەورە دەگەڕێتەوە بۆ ئەو ژینگەیەی تێیدا گەورە بووە، ڕوونی کردەوە کە ئەم شێوازە خێزانییە لە نێوان خوشکەکانی، کچە مامەکانی و کچە پورەکانیاندا باوە، بە جۆرێک زۆربەی خێزانەکانیان لە ژمارەیەکی زۆر لە ئەندامان پێکهاتوون، ئەمەش وای کردووە ئەو قەناعەتەی لەسەرەتای ژیانییەوە لادروست ببێت.

ئەو دووپاتی کردەوە کە پاڵپشتی فیکرەی هاوسەرگیری، منداڵبوون و دامەزراندنی خێزانی گەورە دەکات، چونکە بوونی ژمارەیەکی زیاتری منداڵ پەیوەندییە خێزانییەکان بەهێزتر دەکات و دەبێتە هۆی بەردەوامیی دۆستایەتی و پەیوەندی لە نێوان ئەندامانی خێزانەکەدا لەسەر مەودای دوور.

ئەو جەختی لەوەش کردەوە کە خێزان بۆ ئەو، وەک یەکێک لە گرنگترین سەرچاوەکانی بەختەوەری و جێگیری لە ژیاندا دەمێنێتەوە.