لە دیمەنێکی هاوشێوەی فیلمە خەیاڵییەکاندا، ئێستا چەندین کۆمپانیای جیهانی کێبڕکێ دەکەن بۆ ئەوەی ببنە یەکەم لایەن کە دەست بکەن بە دەرهێنانی سامانی سروشتی لەسەر ڕووی مانگ.

کۆمپانیای "ئینتەرلون" کە لەلایەن ڕۆب مایەرسۆن، بەڕێوەبەری پێشووی کۆمپانیای بلو ئۆریجین دامەزراوە، بڕی ١٨ ملیۆن دۆلاری لە وەبەرهێنەران کۆکردووەتەوە بۆ پەرەپێدانی تەکنەلۆژیایەک کە بتوانێت جۆرە گازێکی دەگمەن بەناوی "هیلیۆم-٣" لە خاکی مانگ دەربهێنێت.

گازی هیلیۆم-٣ کە لە ڕێگەی تیشکی خۆرەوە بە درێژایی ملیارەها ساڵ لەسەر مانگ نیشتووە، لەسەر زەوی زۆر کەم و دەگمەنە.

بە جۆرێک کە دەوترێت تەنها بڕێکی کەم لەم گازە کە بە قەبارەی ناولەپی دەستێک بێت، بە ملیۆنان دۆلاری تێدەچێت.

ئەم گازە بایەخێکی یەکجار گەورەی هەیە بۆ داهاتووی کۆمپیوتەرە کوانتەمەکان و هەروەها پەرەپێدانی وزەی ناوەکی پاک، کە دەتوانێت شۆڕشێکی گەورە لە دابینکردنی وزەی جیهانیدا دروست بکات.

مایەرسۆن پێیوایە کە گەشتکردن بۆ مانگ بۆ هێنانەوەی ئەم سەرچاوەیە تەنها مەسەلەی کاتە، چونکە بەهای ئەم گازە ئەوەندە بەرزە کە تێچووی گەشتە ئاسمانییەکان دادەپۆشێت.

پلانی کۆمپانیاکە ئەوەیە کە ڕۆبۆتی سەربەخۆ بنێرنە سەر مانگ تاوەکو خاکەکە بپاڵێون و پاشان گازە دەرهێنراوەکە لە ڕێگەی هاویشتەرە تایبەتەکانەوە بنێرنەوە بۆ سەر زەوی، ئەمەش سەرەتای دروستبوونی ئابوورییەکی نوێیە لە دەرەوەی هەسارەکەمان.