ژنێکی تەمەن ٧٨ ساڵ یاری بەرزکردنەوەی قورسایی دەکات، توانیویەتی ٣٠ کیلۆ لە کێشی دابەزێنیت هەروەها بەهۆی وەرزشەوەکانییەوە وازی لە خواردنی دەرمانەکانی هێناوە.

بەپێی هەواڵێکی ماڵپەڕی "BoxLifeMagazine" جوان ماکدۆناڵدی تەمەن ٧٨ ساڵ، پێنج ساڵ لەمەوبەر تووشی هەوکردنی جومگەکانی بوو، ئازارێکی زۆری هەبووە، چەندین دەرمانی خواردووە بۆ ئەوەی چاکبێتەوە دووبارە بتوانێتەوە بە ئاسانی بەسەر پلیکانەکاندا سەربکەوێت، بەڵام دوای ئەوەی بڕیاریدا دەست بکات بە وەرزشکردن ژیانی بە تەواوەتی گۆڕاوە.

لە ئێستادا هەفتانە پێنج ڕۆژ وەرزش دەکات و یاری بەرزکردنەوەی قورسایی ئەنجام دەدات، چێژ لە باشی تەندروستی وەردەگرێت و زیاتر لە یەک ملیۆن و ٩٠٠ هەزار فۆڵۆوەری لە ئینستاگرام هەیە.

جوان پێش گۆڕینی کێشی نزیکەی ٩٠ کیلۆگرام بووە و تووشی بەرزی پەستانی خوێن ، کۆلیسترۆڵ و دڵەکزێ بووە، هەروەها تووشی تەنگەنەفەسی بووە، ئازاری جومگەکانیش کاریگەری لەسەر جوڵەی ڕۆژانەی هەبووە.

میشێڵی کچی پێشنیاری کرد کە دایکی بەشداری لە پرۆگرامێکی وەرزشکردن بکات، ئەم بڕیارە سەرەتای گەشتێک بوو کە ژیانی جوانی بە شێوەیەکی ڕیشەیی گۆڕی لە ڕێگەی تێکەڵەیەک لە وەرزشکردن و خۆراک و خەوتن و بیرکردنەوە.

پرۆگرامێکەکەی بەم شێوەیە بوو، وەرزشکردنی بەردەوام، وەرگرتنی ئاوی پێویست، باشترکردنی خەو، خواردنی خۆراکە تەندروستەکان، بەم شێوەیەش توانی تەنها لە مانگی یەکەمدا جوان ٤.٥ کیلۆگرام دابەزێنێت و دەستیکرد بە هەستکردن بە باشتربوونی بەرچاو لە ڕووی جەستەیی و دەروونییەوە.

میشێل لە لێدوانێکدا دەڵێت " گۆڕانکارییەکە ئاسان نەبوو، سەرەتا هەستی بە بێزاری دەکرد بەهۆی سەختی گۆڕانکارییەکە و تێگەیشتن لە هەنگاوەکان"

ئەو خووانەی ژیانی گۆڕیوە بریتین لە بەرزکردنەوەی قورسایی لە هەفتەیەکدا پێنج جار، بەدواداچوون بۆ وەرگرتنی پرۆتین و کاربۆهیدرات و چەوری و خواردنەوەی ئاوی زیاتر بە بەردەوامی و خەوتنی هەشت کاتژمێر لە ڕۆژێکدا بۆ چاکبوونەوە.

تا کۆتایی ساڵی یەکەمی، وازی لە خواردنی دەرمانی پەستانی خوێن هێنا، دواتر بە تەواوی هەموو دەرمانەکانی واز لێ هێنا،

جوان جەخت لەوە دەکاتەوە کە گەشتەکەی خێرا و ئاسان نەبووە، بەڵکو بەردەوام بووە تا گەیشتووە بەم ئەنجامە سەرسوڕهێنەرە، بەم شێوەیەش خاوەنی تەندروستییەکی باشە.