رۆناڵدۆ لە یادی 10 ساڵەدا بۆنێکی نوێی خستە بازاڕەوە کە نرخەکەی 45 بۆ 55 دۆلاردایە.

کریستیانۆ رۆناڵدۆی ئەستێرەی پۆرتوگالی لە چەند رۆژی رابردوودا بە بۆنەی یادی 10 ساڵەی دروستکردنی کۆمپانیایەکی بۆنی تایبەت بە خۆی جۆرێکی نوێی بۆ پیاوان خستە بازاڕەوە و خودی خۆشی ریکلامی بۆ کرد.

بۆنە نوێیەکەی یاریزانە پۆرتوگالیەکە ناوی کریستیانۆ رۆناڵدۆی لێ نوسراوە و تەنها بۆ پیاوانە، قەبارەکەی 100 ملیمە و لە جۆرییاو دی تۆلێتە، نرخەکەشی لە نێوان 45 بۆ 55 دۆلاردایە.

پێکهاتەکانی ئەم بۆنە بریتین لە بێرگامۆت و لاڤاندەر و تۆنکا و بیبەری رەش، لە هەریەکە لە پێگەی فەرمی ئەمازۆن و فرۆشگاکانی سێفۆرا بەردەستن بۆ کڕین لەلایەن خوازیارەکانەوە.

ئەستێرە پۆرتوگالیەکە لە بڵاوکردنەوەی ئەم بۆنە نوێیەدا ئامانجی ئەوەیە کە ئیلهام بەخش بێت بۆ ئەو کەسەی کە بەکاری دەهێنێت و هیچ کاتێک کۆڵنەدات لە بەدیهێنانی خەونەکانی.

بۆنی تایبەت بە کریستیانۆ رۆناڵدۆ لە ساڵی 2015 بۆ یەکەمجار کەوتووەتە بازاڕەوە، ئەو ئەستێرەیە جگە لە تۆپی پێ دەیەوێت بەردەوام بێت لە کارە سەرنجڕاکێشەکانی بەتایبەت لە دروستکردنی براندی تایبەت بە خۆی.