پیاوێکی ئوردنی بانگەشەی ئەوە دەکات کە ماوەی ١٨ ساڵە ئاوی نەخواردووەتەوە.

گرتەیەکی ڤیدیۆیی لە سۆشیال میدیاکانی ئوردندا بڵاوبووەتەوە، مشتومڕێکی زۆری بەدوای خۆیدا هێناوە، دوای ئەوەی گەنجێک بە ناوی ئیبراهیم کە لە چێشتخانەیەکی شاری ئیربید کاردەکات، بانگەشەی ئەوە دەکات کە نزیکەی ١٨ ساڵە ئاوی نەخواردووە.

ئیبراهیم جەخت لەوە دەکاتەوە کە پێشتر هەر کاتێ ئاوی خواردبێتەوە تووشی دابەزاندنی توندی پەستانی خوێن بووە و لە هۆش خۆی چووە، ئەمەش وایکردووە دەستبەجێ پێویستی بە خەواندنی لە نەخۆشخانە بێت، ئاماژەی بەوەشکردووە سەردانی چەندین پزیشک و بنکەی چاودێری تەندروستی کردووە، بەڵام کەس نەیتوانیوە حاڵەتەکەی دەستنیشان بکات و چارەسەرێکی تەواوەتی بکەن، بە وتەی خۆی زۆرێک لە پزیشکەکان ئەم حاڵەتەیان بە نەخۆشییەکی دەگمەن ناوبردووە.

بەڵام بەشێک لە خەڵکی رەخنەیەکی توندیان ئاراستەکرد، پرسیاری ئەوەیان دەکرد کە چۆن جەستەی مرۆڤ دەتوانێت بۆ ماوەیەکی زۆر بەبێ ئاو بژی، هەندێکیشیان باسیان لە ڕووداوێکی هاوشێوە دەکرد کە بە هەمان شێوە لە ساڵی ٢٠١٧ پیاوێکی میسری بە ناوی عەلی بانگەشەی ئەوەی کردووە کە ماوەی پەنجا ساڵە ئاوی نەخواردووەتەوە.