بەرزی کۆلیسترۆڵ مەترسییەکی بێدەنگە بۆ سەر تەندروستی دڵ، زۆرجار هیچ نیشانەیەکی ئاشکرای نییە، بەڵام ئەگەر دەستنیشان نەکرێت و لە کاتی خۆیدا چارەسەر نەکرێت، دەبێتە هۆی تووشبوون بە نەخۆشییە سەختەکانی دڵ یان جەڵتەی مێشک.

لە ماڵپەڕی "skynews" بڵاوکراوەتەوە، بەگوتەی شارەزایان، هەندێک گروپ زیاتر تووشی بەرزی کۆلیسترۆڵ دەبن، وەک پیاوان و کەسانی سەروو پەنجا ساڵ، خووی ناتەندروستی ڕۆژانە لە دیارترین هۆکارەکانی بەرزبوونەوەی کۆلیسترۆڵن، لەوانە خواردنی ئەو خۆراکانەی کە چەوری زۆریان تێدایە، کێشی زیادە، جگەرەکێشان و خواردنەوەی کهول، لە لایەکی ترەوە ڕەنگە هۆکارەکە بۆماوەیی بێت.

ئەوانەی تووشی دەبن لەوانەیە نیشانەی جیاوازیان هەبێت، وەکو دەرکەوتنی نیشانەی بچووکی زەرد لە نزیک گۆشەی ناوەوەی چاو، یان ئەڵقەیەکی سپی کاڵ لە دەوری گلێنەی چاو، نیشانەکانی دیکە بریتین لە ئاوسان بەتایبەتی لە ئەژنۆ یان جومگەی پەنجەکاندا دەردەکەوێت، شارەزایان جەخت لەسەر گرنگی پشکنینی بەردەوامی کۆلیسترۆڵ دەکەنەوە.

بۆ پاراستنی ئاستی کۆلیسترۆڵی تەندروست، دامەزراوەی بەریتانی (BHF) پێشنیاری چالاکیی جەستەیی بەردەوام دەکات، ڕوونی دەکاتەوە کە وەرزشکردن یارمەتی دابەزاندنی کۆلیسترۆڵ دەدات، هەروەها وازهێنان لە جگەرەکێشان یەکێکە لە باشترین هەنگاوەکان بۆ باشترکردنی تەندروستی دڵ و کۆلیسترۆڵ، ئاماژەشیان بەوە کرد کە سوودە تەندروستییەکان لە ماوەی چەند ڕۆژێکدا دەست بە دەرکەوتن دەکەن و لە ماوەی ساڵێکدا ئەگەری تووشبوون بە نەخۆشییەکانی دڵ بۆ نیوە کەم دەبێتەوە.

خۆراک ڕۆڵێکی گرنگی هەیە لە بەڕێوەبردنی ئاستی کۆلیسترۆڵ، شارەزایان پێشنیاری ئەوە دەکەن کە خواردنی ئەو خۆراکانە کەم بکەیتەوە وەکو پاستا، کەرە، کرێم، پەنیر، کێک، بسکیت و هەر شتێک کە زەیتی گوێزی هیندی یان زەیتی خورمای تێدابێت.