توێژینەوەیەک ئاشکرای دەکات کە ماست کاردەکات بۆ بەرەنگاربوونەوە و رێگریکردن لە توشبوون بە شێرپەنجەی کۆڵۆن.

لە ماڵپەڕی " Medical Xpress" بڵاوکراوەتەوە، پسپۆران ئاماژە بەوە دەکەن کە توێژینەوە نوێیەکان ئەوە پیشان دەدەن کە خواردنی بەردەوامی ماست ڕەنگە کاریگەری پارێزەری هەبێت لە دژی هەندێک جۆری شێرپەنجە وەک شێرپەنجەی کۆڵۆن و ڕیخۆڵە.

خواردنی ماست دەتوانێت مەترسی ئەم جۆرە شێرپەنجانە کەم بکاتەوە بە دەستکاریکردنی مایکرۆبایۆمی ڕیخۆڵە، ئەو بەکتریا سروشتیانەی کە لە کۆئەندامی هەرسدا دەژین.

مایکرۆبایۆمی ڕیخۆڵە ڕۆڵێکی سەرەکی دەگێڕێت لە تەندروستی گشتیدا، کاریگەری لەسەر هەرسکردن و سیستمی بەرگری جەستە هەیە.

توێژینەوەکە ئاشکرایکردووە، خواردنی دوو ژەم یان زیاتر لە ماست لە هەفتەیەکدا پەیوەندی بە کەمبوونەوەی مەترسی تووشبوون بە شێرپەنجەی کۆڵۆنەوە هەیە.

توێژینەوەکە زانیارییەکانی زیاتر لە ١٥٠ هەزار بەشداربووی شیکردووەتەوە کە لە ماوەی چەند ساڵێکە بەدواداچوونیان بۆ کراوە، دەرکەوتووە ئەو کەسانەی رۆژانە ماستیان خواردووە ئەگەری توشبوونیان بە شێرپەنجەی کۆڵۆن کەمتربووە بە بەراورد بەو کەسانەی کە ماستیان نەخواردووە.

چەند میکانیزمێک پێشنیار کراوە بۆ ئەوەی ڕوونی بکەنەوە کە چۆن ماست ئەگەری تووشبوون بە شێرپەنجە کەمدەکاتەوە، بەم شێوەیە:

١. دەستکاریکردنی مایکرۆبایۆمی ڕیخۆڵە دەکات، بەکتریاکانی ماست دەتوانن هەمەجۆریی و هاوسەنگی بەکتریاکانی ڕیخۆڵە بەرز بکەنەوە، ئەمەش هەوکردن و ئاستی ماددە شێرپەنجەییەکان کەمدەکاتەوە.

٢. کاریگەری دژە هەوکردنی لەسەر ناوپۆشی کۆڵۆن هەیە.

٣. باشترکردنی کارکردنی ڕیخۆڵە ئەمەش پەیوەندی بە کەمبوونەوەی مەترسی شێرپەنجەوە هەیە.

ماست جگە لە کاریگەرییە ئەگەرییەکانی دژی شێرپەنجە، سوودی تەندروستی دیکەش پێشکەش دەکات، دەوڵەمەندە بە کالیسیۆم کە پاڵپشتی چڕی ئێسک دەکات و ئەگەری تووشبوون بە پووکانەوەی ئێسک کەمدەکاتەوە هەروەها خواردنی بەردەوامی پەیوەندی بە دابەزینی پەستانی خوێن و کەمبوونەوەی مەترسی تووشبوون بە نەخۆشییەکانی دڵ و خوێنبەرەکانەوە هەیە، هەروەها ڕەنگە یارمەتیدەر بێت لە ڕێگریکردن لە نەخۆشی شەکرەی جۆری دووەم و نەخۆشییەکانی دیکە.