هەردوو هونەرمەندی میللی کاروان خەباتی و نێچیر
هەورامی بەرهەمێکی دوێتیان وەک پاڵپشتی بۆ جوڵانەوەی نەوەی نوێ بڵاوکردەوە.
لەئێستادا بانگەهەشەی هەڵبژاردنەکانی عێراق
بەڕێوەدەچێت، لەو سەروبەندەدا هەریەک لە هونەرمەندان کاروان خەباتی و نێچیر هەورامی
گۆرانییەکی دوێتیان بۆ پاڵپشتی و پشتگیری لە جوڵانەوەی نەوەی نوێ بڵاوکردەوە.
گۆرانییەکە بە ناونیشانی
"نەوەی نوێ خەمخۆرەکەم تیشکی گڵۆپت خۆرەکەم"ـە، لە گۆرانییەکەدا ناڕەزای
دەردەبڕن لە خراپی گوزەرانی هاوڵاتییان و داوا لە هاوڵاتییان دەکەن کە دەنگ بە
کاندیدانی نەوەی نوێ بدەن.
گۆرانییەکە بە
هەردوو شێوەزاری سۆرانی و هەورامییە، دیار مەهدی کاری دەرهێنانی بۆ ئەنجامداوە و
پرۆدیوسەری بەرهەمەکە هامنۆ بلاک بووە و کاری وێنەگری لەلایەن پرسیار زاهیرەوە بۆ
ئەنجامدراوە.
لە ناوەڕاستی
ئەم مانگەدا، هونەرمەند کەمال محەمەد بەرهەمێکی بەناوی "ئیتر بەسە"
بڵاوکردەوە و تێیدا باسی لە دۆخی هەرێم دەکات و بە بەرپرسان دەڵێت، "ئێوە بوون
نیشتیمانتان بەم رۆژە گەیاند."
بڕیارە لە ١٠ی ١٠ ئەمساڵدا هەڵبژاردنی پەرلەمانی عێراق
بەڕێوەبچێت و جوڵانەوەی نەوەی نوێ وەک هێزێکی سەرەکی هەرێمی کوردستان تیایدا بەشدارە،
وەک بەرپرسانی جوڵانەوەکە دەڵێن، بەهۆی کارەکانی ماوەی رابردوویان لە پشتگیری کردن
و بە دەمەوە هاتنیان بۆ داواکاری هاوڵاتییان چاوەڕوان دەکەن دەنگەکانیان بە رێژەیەکی
بەرچاو بەرزببێتەوە و ببنە جێی متمانەی بەشێکی زۆری هاوڵاتییان.