بە دروشمی "سلێمانی، لە قوڵایی مێژووەوە بۆ لوتكەی داهێنان" ، بەڕێوەبەرایەتی گشتی رۆشنبیری و هونەری سلێمانی ساڵیادی ٢٣٩ ساڵەی دامەزراندنی شاری سلێمانی دەکاتەوە.

سەعات ٣:٣٠ـی پاش نیوەڕۆی رۆژی یەكشەممەی داهاتوو ١٢/١١/٢٠٢٣ ، لە تەلاری هونەر ساڵیادەكە بە چەندین چالاكی هونەری و كلتوری و رێزلێنان لە كەسایەتییە هونەری و ئەدەبییەكان بەڕێوەدەچێت.

چالاكییەكانی یادەكە، بریتیین لە كردنەوەی پێشانگایەكی شێوەكاری، ئەنجامدانی كۆنسێرتێكی گۆرانی و میوزیكی رەسەنی كوردی بە بەشداری هونەرمەندان: نەژاد بەرزنجی، نیان عەبدوڵا، هەردی عوسمان عەلی، شوان قەرەداغی، سێوە كامیل، هەروەها نمایشكردنی فیلمێكی دۆکیومێنتاری لە بارەی ئەدەب لەشاری سلێمانی.

پاشان نمایشكردنی تابلۆیەكی هەڵپەڕكێی كوردیی و لە كۆتایی یادەكەشدا خەڵاتی رێزلێنان بەسەر چەند كەسایەتییەكی هونەریی و ئەدەبی سلێمانی دابەشدەكرێت، كە رۆڵیان هەبووە لەو دوو بوارەدا.

شاری سلێمانی كە بە پایتەختی رۆشنبیری هەرێمی كوردستان و شاری داهێنەری ئەدەبی جیهانی دادەنرێت، ٢٣٩ ساڵ لەمەوبەر لەسەر دەستی ئیبراهیم پاشای بابان لە ١٤ی تشرینی دووەمی ١٧٨٤ دامەزراوە.