لەچاوپێکەوتنێکدا لەگەڵ دیجیتاڵ میدیای NRT سەمیرا کارزان و هاوسەرەکەی باسیان لە نوێترین بەرهەمی هونەرییان کرد و چەند نهێنییەکی هاوسەرگیرییەکەیان درکاند.

سەمیرا کارزان لەبارەی پڕۆژەی نوێی هونەرەییەوە پێی ڕاگەیاندین کە چەند کارێکی شادیان بەدەستەوەیە لەگەڵ ڕێبازی هاوسەرەی کە لەم مانگەدا کلیپەکەی تۆماردەکەن و پاشان بڵاوی دەکەنەوە و ئەوەشی وت پاش کلیپەکە کار لەسەر ئەلبومێکی هەشت تراکی دەکەن و بڕیار وایە لە ٢٠٢٢دا بڵاوی بکەنەوە.

ئەوەشی خستەڕوو کە هۆکاری هاتنیان بۆ هەرێمی کوردستان دەگەڕێتەوە بۆ تۆمارکردنی چەند گۆرانییەک لەلای ئەفشین شوکری میوزیسیان و دەرهێنەر و جگە لەوەش ئاماژەی بەوەکرد لە ماوەی داهاتوودا سوپڕایزییان بۆ هەوادارەکانیان دەبێت.

لەبارەی ژیانی تایبەتییانەوە و هاوسەرگیرییەکەیانەوە سەمیرا ئەوەی ئاشکراکرد کە هاوسەرگیرییەکەیان لەڕێگەی هونەرەوە بووە و لەدوای ئەوە بووە کە ڕێباز چووەتە شاری بۆکان بەمەبەستی ئەنجامدانی کۆنسێرتێک لە شاری بۆکان لەوێیەوە یەکتریان ناسییوە و لەسەر هەمان ستایل کاریان کردووە بۆیە هەستیان بە نزیکی کردووە و دوای دوو ساڵ کارکردن بەیەکەوە بڕیاریان داوە کە هاوسەرگیری بکەن.

لەکۆتای قسەکاندا ڕێباز ئەوەی خستەڕوو کە سوپڕایزێکی گەورەیان بەدەستەوەیە کە ئەلبوومەکەیان دەبێت لە ساڵی ٢٠٢٢ بڵاودەکرێتەوە و تەواوی کلیپەکانی لە ئەوروپا تۆمار دەکرێت و بەشێوازێکی پڕۆفیشناڵ کاری تێدا دەکرێت و خەڵکی چەندین نەتەوەی جیاواز لە کلیپەکەدا بەشداردەبن و دواتریش مەڕاسیمێک ڕێکدەخەن بۆ بڵاوبوونەوەی ئەلبوومەکە و ناساندنی.

جێگەی ئاماژەیە کە ئەمە یەکەم دەرکەوتنی سەمیرا کارزانە لەڕێگەی کەناڵێکی کوردییەوە و بەرنامەکەی بەم نزیکانە لەسەر شاشەی NRT2 پەخشدەکرێت.

سەمیرا کارزان تەمەنی ٢٢ ساڵە و لەدایکبووی شاری بۆکانی رۆژهەڵاتی کوردستانە، ماوەیەکی کەمە لە بواری هونەرییدا دەرکەوتووە و چەند بەرهەمێکی تایبەت بەخۆی هەیە، زیاتر بە گۆرانی "دکتۆر" ناوبانگی پەیداکردووە.

ڕێباز حسێن ناسراو بە ڕێباز شەمامی ساڵی ١٩٨٥ لەدایکبووە، ‎زیاتر لە ١٥ ساڵە کاری هونەری دەکات، هەرچەندە خۆی خەڵکی سەردەشتی ڕۆژهەڵاتی کوردستانە، بەڵام لە شاری شیراز لە وڵاتی ئێران دەژی، زیاتر لە ٥٠ بەرهەمی فارسی و ٥٠ بەرهەمی کوردی هەیە.