کابینەى پڕۆژە و کابینەى پۆست دابەشکردن..!

2048 جار خوێندراوەتەوە

لەهەموو ڕووەکانەوە پێکهێنانى کابینەى دەیەم ئاڵۆزە و بەقۆناغێکى هەستیاردا تێپەڕدەبێت، ئەمە بەشێکى پەیوەندییان بەگۆڕینى هاوکێشەى هێزەوە هەیە، کە جیا لەڕابردوو هەریەکە لەپارتى و یەکێتى ناتوانن کابینەکە پێکبهێنن و بێ منەتبن و بەشێکێشى پەیوەندییان بەچاوەڕوانى هاوڵاتیانەوە هەیە هەرێم لەبەردەم مەترسیە جدییەکاندا دووربخرێتەوە، ئەوەش بەگەڕانەوەى مافەکانیان و پتەوکردنى دامەزراوە شەرعییەکانى لەوانە پەرلەمان و سەرۆکایەتى و دامەزراوەى قەزایى و سەرخان و ژێرخانە ئابورییەکەى، بۆ ئەمانەش دەبێت گۆڕانکارى لەسیستمى حکومڕانیدا ڕووبدات، دەستى حزب دووربخرێتەوە و دەستى خزمەتگوزارى بۆ خەڵکى بگەڕێتەوە..!

ئەمەیان چۆن دەکرێت..؟ پێشتر تەنها شێوازێکى پێکهێنانى کابینەى حکومەت پێادەکراوە، پارتى و یەکێتى لەسەر بنەماى دابەشکردنى پۆستەکان و بەشکردنى داهات کابینەیان پێکهێناوە، چ بەڵێنێکیان لەکاتى بانگەشەدا بەخەڵک ولایەنگرانى خۆشیانداوە جێبەجێیان نەکردووە، دواى تێکچوونى سادەترین بەرژەوەندییان کابینەکەیان کردۆتە قوربانى ململانێکانیان هەربۆیە نمایندەى هەموو هەرێمى نەکردووە وبڕیار و هەنگاوەکانیشى نەک دڵى خەڵکى خۆشنەکردووە بەڵکو بۆتە بارو گرانى بۆ ژیان و قوتى خەڵکى و بازاڕ و بگرە زۆر پرسى ئەمنیى دیکەش کە پەیوەندییان بە ڕوداوە هەرێمایەتیەکانەوە هەبووە.

گەر پارتى و یەکێتى بیانەوێت ئەم شێوازە لەپێکهێنانى کابینە دووبارە بکەنەوە، ئەوا ئەنجامەکەى دیار دەبێت چارەنوسى لەکابینەى نۆیەم باشتر نابێت و لەگەڵ خۆشیدا هەرێم دەخاتە بەردەم دەیان مەترسى نادیارى دیکەوە بەتایبەت لەئێستاى ئاڵۆزى دۆخى ناوچەکە و فشارەکانى عێراق و چەندین بڕیارو هەنگاوى دیکە لەدژى هەرێم کە پێشتر گیراونەتە بەر و پێشبینى دەکرێت درێژەیان هەبێت.

لەبەرامبەر ئەمەشدا سەردەم و مۆدێلێکى دیکەى پێکهێنانى کابینە هەیە کە لەپڕۆژەکەى نەوەى نوێدا وەکو هێزى سێییەم و یەکلایى کەرەوە بۆ کردنەوەى گرێ کوێرەکانى پێکهێنانى کابینەکەپێشنیار کراوە، ئەمجۆرە پڕۆژەیە پشت نابەستێتە دابەشکردنى پۆست و ئیمتیازات لەنێوان چەند حزبێکدا، بەڵکو هاوڵاتى لەڕێگەى گەڕاندنەوە و دابینکردنى مافەکانییەوە بەهێز دەکرێت، دووبارە دامەزراوە شەرعییەکانى هەرێم دوور لەدەستى حزب پێکدەهێنرێتەوە، بەشێوەیەک ئەو دامودەزگایانە لەخزمەتى هاوڵاتیانى هەرێمدا دەبن بەپلە یەکەم، لەوانە لێخۆشبون لە ٨٠% ى قەرزى سەرهاوڵاتیان، دامەزراندنى گەنجان، گەڕاندنەوەى داهاتى ناوخۆى بۆ خەزێنەى گشتى، دابینکردنى خزمەتگوزارى تەندروستى،گەڕانەوەى پاشەکەوت و پلەبەرزرکردنەوەى فەرمانبەران و چارەسەرکردنى کێشەکانى بەردەم تەوتینى موچە، بەهێزکردنى نەخۆشخانە گشتیەکان، چاودێرى کردن و لێپرسینەوە، وەگەڕخستنى پڕۆژەى ئاواکردنى خزمەتگوزارییە گشتیەکان، ڕێکخستنەوەى هێزى پێشمەرگە، دوورخستنەوەى دەستى حزب لەدامەزراوەى قەزایى...تد.

ئەمانە پڕۆژەى حکومڕانیەکى تەندروستن، هەرێم و خەڵکەکەى لەتەنگەژە قورسەکان دەرباز دەکات، لەدواجاریشدا بڕیارى ڕێکەوتن و ڕێکنەکەوتن لەگەڵ بەغدا بۆ چارەسەرکردنى کێشەکانى موچە و داهات و سەروەرییەکان لەدەستى حزب و بنەماڵە دەسەڵاتدارەکانەوە دەگەڕێنرێتەوە دەستى دەزگا شەرعییەکان، ئەوکات بەپێى بەرژەوەندى خەڵک و موچەخۆران بڕیاردەدرێت نەک بەپێى بەرژەوەندى بەرپرسێک یان بنەماڵەیەکى دەسەڵاتدار و کۆمپانیاکەى، پڕۆژەکەى نەوەى نوێ مۆدیڵى حکومڕانیەک دەهێنێتە سەرزەوى لایەنگرێکى پارتى و یەکێتى و هەموو هاوڵاتیانى هەرێم لێى سودمەند بن، لەسەر دابەشکارى و پەرتکرن و جیاوازى لەنێوان ناوچەکانیشدا ناهێڵێت، هاوڵاتیەک لەدهۆک و هەولێر و سلێمانى و کفرى و خانەقین وەکو یەک سودى لێ دەبینن، ئەم پڕۆژەیە گەر ڕەتبکرێتەوە بۆ پکێهێنانى کابینەى دەیەم، ئیدى بەرپرسیارێیتە مێژووەکەى دەکەوێتەوە سەر شانى پارتى و یەکێتى..