دەیان ھۆکار ھەیە تا دەسەڵاتدارانی ھەرێمیش دەست لەکاربکێشنەوە

1936 جار خوێندراوەتەوە

ئەمە رێگە راستەکەیە کاتێ ووڵات بەرەو وێرانە و ھەڵدێرو قاتو قڕی چوو، ژیانی ھاوڵاتیان کەوتە ناخۆشی، دەبێت وەک سەرۆکوەزیرانی بەریتانیاو وەزیرەکانی بێت دەست لەکار بکێشیتەوە، نەوەک وەکو ئەو ھەرێمەی ئێمە کابرا دەبێیتە بەڕێوەبەری فەرمانگەیەک دەبێت بەخۆی و قونو کورسیەکەی لەگۆڕ بنرێت جا چۆلی دەکات.

لەکاتێکدا دۆخی دارایی و ھەڵئاوسانی ئابووری ووڵات لە بەریتانیا بەرەو خراپی رۆیشت و گوزەرانی ھاوڵاتیان لەسەر رێچکە سەرەکیەکەی ووڵات لایدا و خراپ بوو، سەرکوەزیران و کابینەکەی مەردانە دێنە بەر بەرپرسیارەتی و دەست لەکاردەکێشنەوە، ئیتر دیموکراسی و مافی مرۆڤ بوون لە ووڵاتە ھەر لە قیمە دەمێنێتەوە.

بەپێچەوانەی ئەو ھەرێمەی ئێمە لەکاتێکدا ئەو دەسەڵاتە بۆتە ھۆکاری سەرەکی خراپ بوونی دۆخی ژیانی ھاوڵاتیان و وێران بوونی زۆربەی سێکتەرەکانی کەچی کەسێک لەو دەسەڵاتەی پارتی و یەکێتی نیە بێتە بەر پرسیارەتی و ھەڵوێستەیەک لەسەر ژیانی ھاوڵاتیان بکات و دەست لەکار بکێشێتەوە ھەرنا مێژوویەک بۆ داھاتووی نەوەکانیان تۆمار بکەن.

کەچی بەرپرسانی ئەو ھەرێمە و خۆیان کابینەکانیان بوونەتە بار بەسەر میللەتەوە و دەستیشیان لە قوڕ قوڕاگەی ھاوڵاتیان ناوە و لێناگەرێن ھەناسەش بدەن، کەی کیفەی سمبێلانیان دێ، ئەگەرنا کاتێ لیتری بەنزین گەیشتە 1300 دینارئیتر بەسە بۆ ئەوەی دەستبەرداری ئەو دەسەڵاتە ببن و دەیان ھۆکاری دیکەش ھەیە بۆ ئەوەی دەست لەکار بکێشنەوە و ھێقەی ئەو میللەتە بەردەن تا تاوێک بحەسێتەوە.