پێشمەرگە لەنێوان دوو بژاردەدا
PM:03:08:02/11/2025
808 جار خوێندراوەتەوە
راژان ئەحمەد
+
-
هەرێمی
کوردستان سوپایەکی نیشتیمانی نییە، لە جیاتی ئەوە کۆمەڵێک چەکدار و هێزی
میلیشیامان هەیە کە ملکەچی بڕیاری دوو پارتی دەسەڵاتدارن کە (یەکێتی و پارتین)،
ئەم چەکدارانەی ناو هێزە میلیشیاکان ئامادەن بە بڕیاری بەرپرسانی ناو حیزبەکان
یەکتری بسڕنەوە ئەمەش هەر وەکو لە ڕابردوودا لە شەڕی نێوان ئەو دوو حیزبە
دەسەڵاتدارە ڕوویداوە و پێشبینی دەکرێت لە داهاتووشدا ئەو هێزە میلیشیایانە دژی
یەکتر بەکاربهێنن.
بنەماڵەی
تاڵەبانی و بارزانی بە مەبەست و چەند هۆکارێک ئامادەنین ئەو هێز و چەکدارانە
یەکبگرنەوە و ببن بە سوپایەکی نیشتیمانی، هەر ئەوانن نایانەوێت هێزێکمان هەبێت
هەمووان شانازی پێوە بکەن و ببێتە پشتێنەی سەلامەتی و ئارامی هەرێمی کوردستان.
یەکێتی و پارتی لە ماوەی ٣٤ ساڵی حکومدارییان هەمیشە هەوڵیان
داوە کە ئەو چەکدار و هێزە میلیشیایانەی ژێر دەستی خۆیان یەک نەگرنەوە و لە ژێر هەژموونی
خۆیاندا بۆ کارە پیس و چەپەڵەکانیان لە کاتە هەستیارەکاندا بەکاریان بهێنن.
ئەمەش نیگەرانی
ناوخۆیی و دەرەکی لێکەوتووەتەوە کە بۆچی ئەو هەموو چەکدار و هێزە بێ سەرەوبەرە
هەیە و یەکناگرنەوە؟
بنەماڵەی بارزانی و تاڵەبانی چەکدار و هێزی
میلیشیای تایبەت بە خۆیان هەیە کە بە هەزاران چەکدار مەزەندە دەکرێن لە ژێر ناوی
پێشمەرگە و پارێزەری خاکەوە چەندین گروپی چەکداریان دروست کردووە کە خەرجی هەر
یەکێک لەو گروپانە ملیۆنان دۆلارە و هیچ کاتێکیش ناتوانرێت وەکو هێزێکی نیشتیمانی
پشتیان پێ ببەسترێت، لە دیارترینیان هێزەکانی (حەفتا و هەشتا و دژە تیرۆر و
پێشمەرگەی گوڵان و دەزگای زانیاری و پاراستن و کۆماندۆ ) و هتد..
ئێمەی هاوڵاتی هێزێکی نیشتیمانیمان
دەوێت کە بمانپارێزێت و لە سایەیدا هەست بە ئارامی بکەین نەوەکو ببێتە پارێزەری
خێڵ و حیزب و لایەنەکانی دەسەڵات.