سەرەڕای بەرزبوونەوەی نرخی نەوت و زیادبوونی داهاتە نەوتی و نانەوتییەکان لە هەرێم تاوەکو ئێستا بە تەواوەتی موچەی مانگی ١٢ی ساڵی رابردوو دابەشنەکراوە و لەوبارەیەوە، جێگری سەرۆکی فراکسیۆنی نەوەی نوێ لە پەرلەمانی کوردستان چوار پرسیار ئاڕاستەی حکومەتی هەرێم دەکات.
کاوە عەبدولقادر جێگری سەرۆکی فراکسیۆنی نەوەی نوێ لە پەرلەمانی کوردستان دەڵێت، بەمەبەستی زانینی داهاتەکانی نەوت و ناوخۆ و خاڵەسنوریەکان پرسیاریان ئاڕاستەی وەزارەتەکانی سامانە سروشتیەکان و دارایی حکومەتی هەرێم کردووە.
ئاماژەی بەوەشکردووە، "سەرەڕای
بەرزبوونەوەی نرخی نەوت و زیادبوونی داهاتی خاڵە سنوریەکان و زیادبونی داهاتی ناوخۆ
لە رێگای سەپاندنی باجێکی زۆر بەسەر هاوڵاتییان بەڵام تا ئێستا نەتوانراوە موچەی
مانگی ١٢ی ساڵی رابردوو دابەش بکرێت.
باسی لەوەشکردووە، رێژەیەیەکی زۆر لە داهاتی نەوت دیارنییە
و بەشی هەرەزۆری داهاتی ناوخۆ و خاڵە سنوریەکانیش نەگەڕاوەتەوە خەزێنەی وەزارەتی
دارایی، چونکە پارتی و یەکێتیی بەئاشکرا و بەڕۆژی رووناک دەستیان بەسەرداگرتووە و
بۆخۆیان دەیبەن.
لە ٢ی ئەم مانگەوە، حکومەتی هەرێم دەستی بە دابەشکردنی
موچە کردووە و رۆژانە موچەی یەک یان دوو وەزارەت و شوێن دەدات و بەوهۆیەوە بەشێک
لە وەزارەت و دەستەکان موچەیان وەرنەگرتووە.
ئەوەش لەکاتێکدایە، حکومەتی هەرێم پێشتر بانگەشەی ئەوەی
کرد، کە هەموو ٢٥ی مانگێک موچە دابەشدەکات.
داھاتی نەوتی فرۆشراو بە بۆری زیاتر لە ترلیۆنێک و ٢٠٠
ملیار دینارە و کۆی داھاتی ناوخۆش زیاتر لە ٥٠٠ ملیار دینارە لەگەڵ ھاوکاری مانگانەی
ھاوپەیمانان کە ٢٨ ملیار دینارە، بەڵام حکومەت بۆ دابەشکردنی موچە چاوی لە ٢٠٠ ملیارەکەی
بەغدایە.