بەپێی سەرژمێرییە حکومییەکان لە ساڵی ٢٠٢١دا زنجیرەیەک رووداوی ئاگرکەوتنەوە لە عێراقدا روویاندا و ژمارەیان دەگاتە ٣١ هەزار ٥٣٣ رووداو کە زیانی زۆریان لێکەوتووەتەوە.
ساڵی ٢٠٢١ زنجیرەیەک ئاگرکەوتنەوە لە عێراقدا روویاندا کە دیارترینیان کارەساتی ئاگرتێبەربوونی هەردوو نەخۆشخانەی (ئیبن خەتیب) بوو لە بەغدادی پایتەخت و نەخۆشخانەی کۆرۆنا بوو لە ناسرییە، کە بەهۆیانەوە سەدان کەس گیانیان لەدەستدا و هەزارەهای دیکەش بریندار بوون بەو پێیەش ژمارەی پێوانەیی تۆمارکرد لە ساڵی ٢٠٢١دا.
بەڕێوەبەرایەتی
بەرگری شارستانی عێراق سەرژمێرییەکانی رووداوەکانی ئاگرکەوتنەوەی لە عێراقدا راگەیاند،
کە لەلایەن بەرگری شارستانییەوە کوژاونەتەوە و کۆتاییان پێهێنراوە.
بەگوێرەی ئەو سەرژمێرییە،
کۆی رووداوەکان دەکاتە ٣١ هەزار و ٥٣٣ رووداو تەنها لە ماوەی ساڵی ٢٠٢١دا، هەروەک
بەغداد لە ریزی پێشەوەی ئەو پارێزگاکاندایە کە رووداوی ئاگرکەوتنەوە تیادا تۆمار
کراوە.
دیارترینی هۆکاری
ئەو رووداوانە بریتیین لەمانە:
١/ شۆتی کارەبایی
٢/ یاریکردنی منداڵان بە ئامێر و شتومەکی
ناوماڵ
٣/ پاشماوەی جگەرە
٤/ رووداوی ئاگرتێبەربوونی بە مەبەست
٥/ رووداوی ئاگرتێبەربوون بەهۆی پریشکی دەرەکییەوە
٦/ دزەکردنی گاز
٧/ لێچوونی سوتەمەنی
٨/ هۆکاری ناکۆکی خێڵەکی
٩/ هۆکاری هاتوچۆ
١٠/ هۆکاری تەقینەوەکان
هەروەک ٥٥٤
رووداو تۆمارکراون کە هۆکارەکانیان نەزانراون.
ئەم سەرژمێرییە
بووەتە باسێک لە عێراقدا و گفتوگۆیەکی بەرفراوانی لەگەڵ خۆیدا هێناوە، بەو پێیەی بەشێک
لە هاوڵاتییان پێیان وایە بەرپرسی ئەو رووداوانە لایەنە حکومی و سیاسییەکان نین بەڵکو
هۆکارەکەی لاوازی ئاستی رۆشنبیری کۆمەڵگە و نەشارەزابوونیانە لە سەلامەتی گشتیدا، نمونەشیان
پاشماوەی جگەرەیە کە هاوڵاتییان لە شوێنە گشتییەکاندا فڕیی دەدەن و بەهۆیەوە نزیکەی
هەزار رووداوی ئاگرتێبەربوون روویانداوە تەنها لەمساڵدا.