پوتین لە وەڵامی رۆژنامەنووسەکەدا باسی لەوەکرد، "ئایا هیچ پەیوەندییەک هەیە لە نێوان دابەزاندنی وێنەیەکی (ئەدۆڵف هیتلەر)ی سەرۆکی نازییەکان لە ئاژانسی (ئەلفەوجی خالید) کە دابینکراوە بۆ جەنگاوەرە پێشووەکانی جەنگی جیهانی دووەم، لەگەڵ ئازادی رادەربڕیندا؟"، وتیشی، "با بیربکەینەوە، ئێمە دەبێت ئازادی دابین بکەین بە شێوەیەکی گشتی، لەبەر ئەوەی بەبێ ئازادی، داهاتوویەکی خەمناک چاوەڕوانمانە، بەڵام دەبێت پەی بەو راستییە ببەین و دانی پێدابنێین کە ئەم ئازادییە دژە لەگەڵ ئەو ئامانجانەی کە گاڵتە بە هەستی کەسی بەرامبەر دەکەن."

ئەوەشی خستەڕوو، "ئایا سوکایەتیکردن بە پێغەمبەری ئیسلام، ئازادی رادەربڕینە؟"، هەر خۆشی وەڵام دەداتەوە و دەڵێت، "نەخێر، من پێم وانییە، بەڵکو ئەم جۆرە سوکایەتی پێکردنانە سەردەکێشێت بۆ دەرەنجامی مەترسیدار."

لە باسکردنی ئەو دەرەنجامانەش، پوتین ئەو هێرشە چەکدارییە خوێناوییەی ٧ی کانوونی دووەمی بە نموونە هێنایەوە، کە پێش چەند ساڵێک لە بنکەی گۆڤاری "شارلی هێبد"دا روویدا، پاش ئەوەی گۆڤارەکە چەند وێنەیەکی کاریکاتێری بڵاوکردەوە لەسەر پێغەمبەری ئیسلام.

پوتین باسی لەوەکرد، دەبێت لەبەر ئەو جۆرە رووداوانە رێگا بە کاری وا نەدرێت بە ناوی ئازادی رادەربڕین.