دیار جه‌مال ئه‌ندامی لیژنه‌ی باڵای لیژنه‌ هاوبه‌شه‌كانی قائیمقامییه‌تی سلێمانی به‌ بەڕێوەبەرایەتی هاتوچۆی سلێمانی راگه‌یاند، له‌ شاری سلێمانی سێ‌ جۆر گه‌راج هه‌یه‌ كه‌ نرخه‌كانیان به‌م جۆره‌یه‌:

جۆری ١: ئه‌و پاركانه‌یه‌ كه‌ چه‌و رێژ یان خۆڵن، بۆ ٥ كاتژمێر هه‌زار دیناره‌.

جۆری ٢: ئه‌و پاركانه‌ی كۆنكرێت یان قیرن‌و چه‌رداغیان هه‌یه‌ بۆ ٥ كاتژمێر هەزار و ٢٥٠ دیناره‌.

جۆری ٣: ئه‌و پاركانه‌ی له ‌باڵه‌خانه ‌‌و بیناكاندان ‌و داخراون بۆ ٥ كاتژمێر هەزار و ٥٠٠ دیناره‌.

ئاماژەی بەوەشکردووە، بۆ هه‌ر جۆرێكیشان ئه‌گه‌ر له‌ ٥ كاتژمێر زیاتر بوو، ئه‌وا خاوه‌ن گه‌ڕاجه‌كه‌ بڕیار ده‌دات چ بڕه‌ پاره‌یه‌ك وه‌ربگرێت، چونكه‌ ئه‌وان ڕێگه‌ پێدراون تاوه‌كو دوو ئه‌وه‌نده‌ی پاره‌كه‌ وه‌ربگرن.

وتیشی، "مه‌رجه‌ هه‌موو گه‌ڕاجێک مۆڵه‌تی هه‌بێت ‌و كامێرای چاودێری تێدا بێت‌ و تابلۆی هه‌بێت ‌و نرخه‌كه‌ی له‌سه‌ر تابلۆكه‌ نوسرابێت‌ و سیاجی هه‌بێت‌ و ته‌والێتی تێدابێت."

له‌باره‌ی ئه‌وه‌ی ئه‌گه‌ر بۆ ماوه‌یه‌كی كه‌متر ئۆتۆمبێل رابگیرێت هه‌ر هه‌مان نرخه‌ دیار جه‌مال روونیكرده‌وه‌، له‌به‌ر ئه‌وه‌ی سیستمێكی ئه‌لكترۆنی پێشكه‌وتوو نییه‌ له‌ گه‌راجه‌كاندا تاوه‌كو كاتی هاتن ‌و چوونی ئۆتۆمبێله‌كان دیاریبكات، بۆیه‌ ناتوانرێت كه‌متر له‌و پاره‌یه‌ی لێبسه‌ندرێت كه‌ دیاریكراوه‌.

سه‌باره‌ت به‌و گه‌راجانه‌ی كه‌ له ‌ده‌ره‌وه‌ی گه‌راج سه‌یاره‌ راده‌گرن ‌و پاره‌ش له ‌هاوڵاتیان وه‌رده‌گرن وتی، "ئه‌وه‌ سه‌رپێچییه ‌و خاوه‌نی ئۆتۆمبێله‌كه‌ ده‌توانێت سكاڵا بكات له‌ خاوه‌ن گه‌ڕاجه‌كه‌ ‌و ئێمه‌ش ئیجرائاتی له‌گه‌ڵدا ده‌كه‌ین."

باسی لەوەشکردووە، "هه‌ر هاوڵاتییه‌ک كێشه‌ی هه‌بێت ده‌توانێت له‌ رێگه‌ی ژماره‌ ته‌له‌فۆنی (07708677777) یاخود ژماره‌ (100)ی (JCC)ه‌وه‌ په‌یوه‌ندی بكات، یان سه‌ردانی قائیمقامییه‌ت بكات ‌و سكاڵا بنوسێت.

له‌باره‌ی بڕی سه‌رپێچییه‌كانیشه‌وه‌ دیار جه‌مال رایگه‌یاند، بۆ جاری یه‌كه‌م بڕی ٢٥٠ هه‌زار دیناره‌ ‌و له ‌جاری دووه‌مدا بڕی ٥٠٠ هه‌زار دیناره‌، بۆ جاری سێیه‌م داخستنی گه‌راجه‌كه‌یه‌ بۆ ماوه‌ی حه‌وت رۆژ ‌و ئه‌گه‌ریش دوای ئه‌وه‌ش به‌رده‌وامبوو له‌ سه‌رپێچیكردن ئه‌وا مۆڵه‌ته‌كه‌ی لێده‌سه‌نرێته‌وه.