فەرماندەیی ئۆپراسیۆنە هاوبەشەكانی عێراق رایگەیاند، لەگەڵ هێزەكانی پێشمەرگە رێکكەوتن لەسەر كاری هەواڵگری و زیادكردنی هاوكارییەكان لە نێوان هێزەكانیاندا، هاوکات، وەزارەتی پێشمەرگە دەڵێت، "لە بەیانییەوە پلان دادەنرێت تاوەکو ئۆپراسیۆنی هاوبەش دژی داعش ئەنجام بدرێت."
فەرماندەیی ئۆپراسیۆنە هاوبەشەكانی عێراق راگەیەنراوێكی بڵاوکردەوە و تیایدا هاتووە، دوای كۆبوونەوەیان لەگەڵ شاندی وەزارەتی پێشمەرگە رێکكەوتن لەسەر كاری هەواڵگری و زیادكردنی هاوكارییەكان لە نێوان هێزەكانی هەردوولا کراوە.
ئاماژەی بەوەشکردووە،
"لە كۆبوونەوەمان لەگەڵ وەزارەتی پێشمەرگە پرسی سەربازی و ئەمنی گفتوگۆی لەبارەوە
كرا و یەكخستنی هەوڵەكان بۆ بەرەنگاربوونەوەی داعش تاوتوێكرا."
هاوکات، جەبار یاوەر ئەمینداری وەزارەتی پێشمەرگە بە ئێن ئاڕ تی
راگەیاند، کۆبوونەوەکە بۆ ئەوەبووە کاری هاوبەشی نێوان وەزارەتی پێشمەرگە و سوپای
عێراق زیاتر بکرێت.
ئەوەشی خستووەتەڕوو، لە کۆبوونەوەکەدا بەرپرسانی وەزارەتی پێشمەرگە و
سوپای عێراق بیروڕای خۆیان لەسەر چۆنییەتی هەماهەنگی کردنی یەکتری لە مەیداندا
خستەڕوو.
جەبار یاوەر وتووشییەتی، لە بەیانییەوە لەلایەن فەرماندە
مەیدانییەکانەوە پلان دادەنرێت تاوەکو ئۆپراسیۆنی هاوبەش دژی داعش و هەماهەنگی لە
کاری هەواڵگریدا ئەنجام بدرێت.
ئەمەش لەکاتێکدایە،
شەوی ٢ی ئەم مانگە، چەکدارانی داعش ھێرشیانکردە سەر گوندی خدرجیجە لە بناری قەرەچوغ،
لە ئەنجامدا ١٣ پێشمەرگە و ھاوڵاتی شەھید بوون و چەند کەسێکی دیکەش برینداربوون.
بڕیار جاف، گەرمیان