دانا عەبدولکەریم وەزیری ئاوەدانکردنەوەی حکومەتی هەرێم لە بەرنامەی تاوتوێی ئێن ئاڕ تیدا رایگەیاند، "بۆیە لێبڕینی موچە نەما چونکە ئێستا داهات لە بەردەستی حکومەتدا هەیە و ئەگەر دۆخەکە بەم جۆرەوە بڕوات لە مانگەکانی داهاتووشدا لێبڕینی موچە نامێنێت."

باسی لەوەشکرد، بڕیاری لێبڕینی موچە بڕیاری حکومەت خۆیەتی.

لەبارەی دۆخی رێگا و بانەکانەوە ئاماژەی بەوەکرد، دروستکردنی سەرجەم رێگا دووسایدەکان کاری تێدا دەکرێت و دەشڵێت، "هەنگاوی باشمان بڕیووە بۆ دروستکردنی هێڵی شەمەندەنەفەر، لە چەند رۆژی داهاتوودا تیمێکی ئەڵمانی دێتە هەرێم بۆ دیزاینکردنی هێڵێ شەمەندەنەفەر."

راشیگەیاند، "دووچاری بارودۆخی نەخوازراو نەبینەوە هێڵی شەمەندنەفەر لە هەرێم دەبینین و بە درێژای ٦٢٠ کیلۆمەتر لە زاخۆوە تاوەکو دەگاتە پەروێزخان هێڵی شەمەندەنەفەر دروستدەکرێت."

ئەوەش لە کاتێکدایە، ئەمڕۆ حکومەتی هەرێم رایگەیاند، بڕیاریانداوە لێبڕینی موچە کۆتایی پێبهێنن و سبەینێ یەکەم وەزارەت بەبێ لێبڕین موچە وەردەگرێت.

نزیکەی ساڵێک دەبێت فەرمانبەرانی هەرێم بە لێبڕینی ٪٢١ـەوە موچە وەردەگرن و لە ساڵی ٢٠١٤شەوە موچەی فەرمانبەران یان نەدراوە یان بە لێبڕینەوە دراوە، یانیش بۆیان پاشەکەوت کراوە، کە روون نییە حکومەت ئایا پاشەکەوتەکە دەداتەوە بە فەرمانبەران یان نا.