سەرۆکی هاوپەیمانی دەوڵەتی یاسا رایگەیاند، "پێویستە پەلە بکرێت لە پێکهێنانی حکومەتی کۆدەنگی نوێی عێراق، کە بتوانێت تەواوی داواکارییەکانی گەلی عێراق بۆ خزمەتگوزاریی و هەلی کار بەدیبهێنێت."
نوسینگەی نوری مالیکی سەرۆکی هاوپەیمانی دەوڵەتی یاسا راگەیەنراوێکی بڵاوکردەوە و تیایدا هاتووە، جەختدەکەنەوە لە یەکگرتنی تەواوی هەوڵەکان و هەماهەنگی کۆی هێزە سیاسییەکان لە ناو پەرلەمان لەپێناو تێپەڕاندنی قەیرانەکان.
نوری مالیکی بە
ئەندامانی نوێی پەرلەمانی عێراق دەڵێت، "تا دەتوانن کاربکەن و تیبکۆشن، پابەندبن
بە بنەما نیشتیمانییەکانەوە، پەیوەندیتان لەگەڵ هاوڵاتیاندا هەبێت، ئەو یاسایانەش
پێشنیاز بکەن، کە داواکاریی و پێویستی عێراقییەکان بۆ خزمەتگوزاریی دەهێنێتەدی."
دوێنێ، هەریەکە
لە موقتەدا سەدر و لایەنە شیعییەکان لە ماڵی هادی عامری کۆبوونەوە و بەگوێرەی زانیارییەکان،
رێککەوتن کراوە لە نێوان لایەنە بەشداربووەکاندا بۆ پێکهێنانی لیژنەیەکی هاوبەش
تاوەکو ببێتە کارنامەی حکومەتی داهاتوو و بنەمایەکیش بێت بۆ پێشکەشکردنی بۆ هاوبەشە
سیاسییەکانی دیکە.
لە مانگی ١٠ی ئەمساڵدا،
هەڵبژاردنی پێشوەختەی پەرلەمانی عێراق بەڕێوەچوو و تیایدا بۆ یەکەمجار نەتەوەیەکگرتووەکان
چاودێری هەڵبژاردنەکانی کرد، لە چەند رۆژی رابردووشدا کۆتا ئەنجامی هەڵبژاردنەکان
لە دوای تانەکان و پێداچوونەوەکان راگەیەنرا.