ئەحمەد شەمری ئاماژەی بەوەشکردووە، هەڵبژاردنی سەرۆکوەزیرانی داهاتووی عێراق بەشێوەی رێککەوتن دەبێت و وەزارەتەکانیش لەسەر بنچینەی دەستکەوتەکانی هەڵبژاردن دیاریدەکرێن و لایەنەکان کۆکبوون لەسەر ئەوەی ئەم جۆرە کۆبوونەوەیە درێژەی هەبێت، چونکە دەبێتە کلیلی کردنەوەی چەندین دەرگای دیکەی چارەسەرکردنی کێشەکانی ناوماڵی شیعە.

لە دەستنوسێکدا کە وێنەیەکی دەست ئێن ئاڕ تی کەوتووە، سەدر لەبارەی حکومەتی نوێوە نووسیویەتی، "حکومەتی داهاتوو نە رۆژهەڵاتی دەبێت نە رۆژئاوایی و حکومەتێکی زۆرینەی نیشتیمانی دەبێت".

ئاماژەی بەوەشکرد، سەرۆکی رەوتی سەدر و چوارچێوەی هەماهەنگی گەشتوونەتە رێککەوتن لەبارەی حکومەتی داهاتووی عێراقەوە و "هەموو لایەنەکان رێککەوتوون لەسەر پێکهێنانی لیژنەیەکی هاوبەش بۆ ئامادەکردنی نووسراوێکی یەکگرتوو کە لە بنەمای بەرنامەیەکی حکومی پێکبێت بۆ ئەوەی پێشکەش بە هاوبەشە سیاسییەکان بکرێت لەبارەی حکومەتی داهاتووەوە."

لە مانگی تشرینی یەکەمی رابردووی ئەمساڵدا، هەڵبژاردنی پێشوەختەی پەرلەمان بەڕێوەچوو و تیایدا بۆ یەکەمجار بوو نەتەوە یەکگرتووەکان چاودێری هەڵبژاردنەکان بکات، دوێنێش کۆتا ئەنجامی هەڵبژاردنەکان لە دوای تانەکان و پێداچوونەوەکان راگەیاندرا.