سەردێڕ:

کریستیانەکانی میسر لە جەژنی موسڵمانەکاندا پێشبڕکێ بۆ قوربانیکردن دەکەن

PM:02:04:22/07/2021

3600 جار خوێندراوەتەوە

ساڵانە قەشە کریستیانەکانی میسر لە جەژنی قورباندا پسولەی ئەنجامدانی قوربانی لە وەزارەتی ئەوقافی ئەو وڵاتە دەکڕن و ژمارەیەک قوربانی ئەنجامدەدەن و گۆشتەکەی بەسەر موسڵمانان و کریستییانە هەژارەکاندا دابەشدەکەن.


یوئانس ئەدیب سەرۆکی کڵێسای قبتییە کاسۆلیکەکانی میسر لە پارێزگای دەریای سور لە میسر رایگەیاند، ئەمە بۆساڵی شەشەمە قەشەکانیان "پسولەی قوربانی" لە وەزارەتی ئەوقاف وەردەگرن و بەشداری لە ئەنجامدانی قوربانیدا دەکەن.

ئاماژەی بەوەشدا، هەموو ساڵێک پسولەی قوربانیکردن لە وەزارەتی ئەوقاف دەکڕن و لە شوێنێکی نزیک لە کڵێساکانیان قوربانییەکە ئەنجام دەدەن و گۆشتەکەشی بەسەر هەژارە موسڵمان و کریستیانەکاندا دابەشدەکەن.

ئەوەشی خستووەتەڕوو، ئەم ساڵ بڕیاریانداوە تەنها پسولەی قوربانی لە وەزارەت نەکڕن، بەڵکو خۆیان مەڕ بکڕن و بیکەنە قوربانی، ئاماژەیان بەوەکردووە، "ئێمە و موسڵمانەکان جەژنەکانمان یەک جەژنە، لە یەک وڵاتدا دەژین و یەک نیشتیمانمان هەیە، هەوڵدەدەین دڵی هەموو لایەک خۆشبکەین."

ئەنبا ئێلاریۆن سەرۆکی قەشەکانی قبتییە ئەرسەدۆکسییەکان لە پارێزگای دەریای سور رایگەیاند، "پڕۆژەکە یئەوقاف هەلێکی باشە بۆ نانپێدان بە کەسە برسییەکان و رێزگرتنیان جا موسڵمانبن یان کریستیان، بەشداریکردنمان لە بۆنە و ئاهەنگەکاندا کارێکی سروشتی و ئاساییە".

دەشڵێت، ساتە وەختی دابەشکردنی گۆشت بە سەر هەژاراندا هەمووی بەرەکەتە.

ئەمە لەکاتێکدایە، لە ساڵی ٢٠٠٦ەوە بانکی خۆراکت میسری پسولەی قوربانی کردنی بە ئامانجی ئاسانکاری ئەنجامدانی قوربانی و دابەشکردنی بەشێوەیەکی دروست بەسەر هەژاراندا داهێناوە و ماوەی شەش ساڵیشە بەشێک لە کریستیانەکانی ئەو وڵاتە بەشداریدەکەن لە کڕینی پسولەکە و مەراسیمی قوربانیکردندا.







گەلەری