سەردێڕ:

لە تەقینەوەیەکەدا لە ئەفغانستان ١٦ کەس کوژران

PM:01:19:15/10/2021

2916 جار خوێندراوەتەوە

میدیا ئەفغانییەکان بڵاویانکردەوە، بەهۆی تەقینەوەیەکەوە لە مزگەوتێکی شیعە لە شاری قەندەهاری ئەفغانستان لەکاتی نوێژی هەینی، ١٦کەس کوژران و ٣٢ی دیکەش برینداربوون.


لەبارەی ئاماری زیانە گیانییەکانیشەوە، چاوگێک لە لە نەخۆشخانەی ناوەندی شاری قەندەهار بە میدیاکانی راگەیاندووە، "تا ئێستا ١٦ کوژراو و ٣٢ی بریندار گەیەندراونەتە نەخۆشخانە".

وتەبێژێک بەناوی بزووتنەوەی تاڵیبانیش رایگەیاند، تەقینەوەیەک مزگەوتێکی پەیڕەوکەرانی مەزهەبی شیعەی لە باشووری ئەفغانستان لەکاتی نوێژی هەینیدا کردووەتە ئامانج و بەوهۆیەشەوە، ژمارەیەکی زۆر هاوڵاتی برینداربوون.

لەبارەی تەقینەوەکەشەوە، ئاژانسی هەواڵی فرانس پرێس ئاماژەی بەوەکردووە، سێ تەقینەوەی یەک لە دوای یەک لەکاتی نوێژی هەینیدا مزگەوتەکەی هەژاندووە و ژمارەیەکی زۆری هاوڵاتیانیش بەشدارییان لە نوێژی هەینی لەو مزگەوتەدا کردووە.

ئەو وتەبێژەی تاڵیبان ئەوەشی خستوەتەڕوو، تائێستا هیچ گرووپ و کەسێک بەرپرسیارێتی خۆی لە ئەنجامدانی تەقینەوەکە نەگرتووەتەئەستۆ. 

هەفتەی رابردووش، لە ئەنجامی تەقینەوەیەکدا کە مزگەوتێکی هۆزی هەزارەی سەر بە مەزهەبی شیعەی لە شاری قندووزی لە باکووری رۆژهەڵاتی ئەفغانستان کردە ئامانج و بەوهۆیەشەوە، ٥٠ کەس کوژران و ١٤٠ی دیکەش برینداربوون.

رۆژی ١٥ی ئابی ئەمساڵ، بزووتنەوەی تاڵیبان تەواوی ئەفغانستانی کۆنترۆڵکرد و کۆتایی بە حوکمی ئەشرەف غەنی سەرۆک کۆماری ئەفغانستان هێنا، دوای چەند هەفەتەیەکیش تاڵیبان حکومەتی کاربەڕێکەری کۆماری ئیسلامی ئەفغانستانی راگەیاند.








گەلەری