دەستەی باڵای سەربەخۆی هەڵبژاردنەکانی عێراق رایگەیاند، چوار شوێنی تایبەت بە وەرگرتنی تانە و پەڵپی کاندید و لایەنە سیاسییەکان لەسەر ئەنجامی هەڵبژاردنەکانی عێراق دیاریکردووە.
جومانە غەلای وتەبێژی کۆمسیۆنی باڵای سەربەخۆی هەڵبژاردنەکانی عێراق بە ئاژانسی هەواڵی عێراقی راگەیاندووە، دەتوانرێت تانە و پەڵپەکان ئاڕاستەی هەریەکە لە نوسینگەکانی هەڵبژاردن لەپارێزگاکان، نوسینگەی لیژنەی باڵا و لیژنەی دادوەری هەڵبژاردنەکانی عێڕاق بکەن".
وتەبێژی کۆمسیۆنی باڵای هەڵبژاردنەکانی عێراق ئەوەشی خستەڕوو،
"نوسینگەی نیشتیمانی سەر بە دەستەی باڵای هەڵبژاردنەکان لیژنەیەکی تایبەتی لە
بەشی تانە و پەڵپەکان رێکخستووە بەمەبەستی وەرگرتنی تەواوی ئەو رەخنە و تانانەی کە
لە هەڵبژاردنەکەی عێراق دەگیرێن.
رۆژی ١٠ی ئەم مانگە دەنگدانی گشتی و رۆژی هەینی ٨ی ئەم مانگەش دەنگدانی
تایبەت بۆ ھەڵبژاردنی پێنجەمین خولی پەرلەمانی عێراق لە کاتژمێر ٧ی بەیانی دەستیپێکرد
و تا ٦ی ئێوارە بەردەوامبوو.
دوای تەواوبوونی هەردوو دەنگدانی (گشتی و تایبەت)، کۆمسیۆنی باڵای سەربەخۆی
هەڵبژاردنەکانی عێراق رایگەیاند، کە پرۆسەکە بەسەرکەوتوویی بەڕێوەچووە و لە ئەنجامی
بەراوردکاری دەنگەکانی دەستی و ئەلیکترۆنیدا، دەنگەکان هاوتابوون.