سەردێڕ:

ھادی عامری دوایین لێدوانی لەبارەی ئەنجامی بەرایی هەڵبژاردنەکانەوە بڵاوکردەوە

PM:01:07:12/10/2021

13416 جار خوێندراوەتەوە

لەپاش تەواوبوونی پرۆسەی دەنگدانی گشتی و تایبەت و دواتریش راگەیاندنی ئەنجامە بەراییەکانی هەڵبژاردن، هادی عامری سەرۆکی هاوپەیامنی فەتح رایگەیاند، "ئەنجامی بەرایی ھەڵبژاردنەکان، دەستکاری کراوە و رەتی دەکەینەوە".


ئەمڕۆ سێشەممە، لە راگەیەندراوێکیدا ھادی عامری سەرکردەی ھاوپەیمانیی فەتح ئەنجامی بەرایی ھەڵبژاردنەکانی پێشوەختەی ئەنجوومەنی نوێنەرانی عێراقی رەتکردەوە و وتی، "دەستکاری کراوە".

سەرۆکی هاوپەیمانی فەتح لە راگەیەندراوەکەیدا ئەوەشی وتووە، "ئەنجامی بەرایی ھەڵبژاردنەکانی پێشوەختە قبوڵ ناکەین، چونکە دەستکاری کراوە"، و بەھەموو توانایەک، بەرگریی لە دەنگی کاندیدان و دەنگدەرانی خۆیان دەکەن.

دوای راگەیاندنی ئەنجامە بەراییەکانی هەڵبژاردنی پێشوەختەی عێراق، ھەریەک لە ھاوپەیمانیی فەتح، ھاوپەیمانیی دەوڵەتی یاسا، عەسائیبی ئەھلی حەق و کەتائیبی حزبوڵڵا رایانگەیاندبوو، "ئەنجامی بەرایی ھەڵبژاردنەکانی پێشوەختە کە لەلایەن کۆمیسیۆنی باڵای سەربەخۆی ھەڵبژاردنەکانەوە راگەیەندراوە، رەت دەکەینەوە".

دوێنێ دووشەممە، کۆمسیۆنی باڵای سەربەخۆی ھەڵبژاردنەکان ئەنجامی بەرایی ھەڵبژاردنەکانی پێشوەختەی ئەنجوومەنی نوێنەرانی عێراقی بڵاوکردەوە و تیایدا، ژمارەی کورسییەکانی ھاوپەیمانیی فەتح بە بەراورد بە ھەڵبژاردنەکانی ٢٠١٨، ٣٤ کورسی کەمی کردووە و ئەمجارەیان ١٤ کورسی بەدەستھێناوە، بەجۆرێک ھاوپەیمانیی فەتح لە ھەڵبژاردنەکانی ٢٠١٨دا، ٤٨ کورسی بەدەستھێنابوو.

رۆژی ١٠ی ئەم مانگە دەنگدانی گشتی و رۆژی هەینی ٨ی ئەم مانگەش دەنگدانی تایبەت بۆ ھەڵبژاردنی پێنجەمین خولی پەرلەمانی عێراق لە کاتژمێر ٧ی بەیانی دەستیپێکرد و تا ٦ی ئێوارە بەردەوامبوو.

دوای تەواوبوونی هەردوو دەنگدانی (گشتی و تایبەت)، کۆمسیۆنی باڵای سەربەخۆی هەڵبژاردنەکانی عێراق رایگەیاند، کە پرۆسەکە بەسەرکەوتوویی بەڕێوەچووە و ئەنجامی بەراوردکاری دەنگەکانی دەستی و ئەلیکترۆنیدا، دەنگەکان هاوتابوون.








گەلەری