سەردێڕ:

ڤیدیۆ.. بۆ یەکەمجار دیمەنێکی دیکەی تەقینەوەکەی بەیروت بڵاوکرایەوە

PM:05:30:07/10/2021

12104 جار خوێندراوەتەوە

بۆ یەکەمجار لە تویتەر گرتە ڤیدیۆییەکی تەقینەوەکەی ساڵی ٢٠٢٠ی شاری بەیروتی لوبنان بڵاوکرایەوە.


رۆژی ٤ی ئابی ٢٠٢٠، لە بەندەری بەیروتی پایتەختی لوبنان تەقینەوەیەکی گەورە روویدا و بەوهۆیەشەوە، زیاتر لە ٢٠٠ کەس تیایدا گیانیان لەدەستدا و بە سەدان کەسیش بریندار بوون، سەرەڕای ئەوەی هەشت کیلۆمەتری بە چواردەوری شوێنی رووداوەکەدا وێرانکرد.

تەقینەوەکە لە کۆگایەکی چەک و تەقەمەنیدا بوو لەسەر بەندەری بەیروت و تیایدا زیاتر لە ٢٠٠ کەس گیانیان لەدەستدا و زیاتر لە شەش هەزار کەسیش بریندار بوون.

وەک ئامارە فەرمییەکان باسی دەکەن، ٣٠٠ هەزار کەس ماڵ و شوێنی مانەوەیان بۆ ماوەیەکی کاتی جێهێشت و زیاتر لە ٧٠ هەزار شوقەی نیشتەجێبوون رووخان و زیاتر لە نۆ هەزار باڵەخانەش زیانیان بەرکەوت و زیاتر لە ٥٠ هەزار کەس کارەکانیان لەدەستدا، سەرەڕای ئەو زیانەی بەر دامەزراوەی فەرمی و نەخۆشخانە و خوێندنگاکان کەوت.

ئاژانسی لێکۆڵینەوەی فیدراڵی ئەمریکا (FBI) ئاشکرایکردووە، ئەو تەقینەوەیەی روویدا نزیكەی ٢٠٪ی ئەو نیتراتی ئەمۆنیۆمە بووە كە لەو بارهەڵگرەدا بووە.

ئەوەش خراوەتەڕوو، بارهەڵگرەکە ژمارە ١٢ بووە و بڕی ٥٥٢ تۆن نیتراتی ئەمۆنیۆمی تێدا بووە، لەکاتێکدا بڕی راستەقینەی ئەو نیتراتەی پێشتر لەبارهەڵگرەکەدا بووە زیاتر لە دوو هەزار تۆن بووە و لەساڵی ٢٠١٣دا بەتاڵکراوە.









گەلەری