لە ئەنجامی گەڕان و پشکنینی ماڵپەڕی فەرمی ئاژانسەکە، دەرکەوت هیچ هەواڵێکی لەو جۆرە بڵاونەکراوەتەوە، هاوکات، لێدوانی بەرپرسانی کۆمپانیای فەیسبووک و راگەیەنراوی تیمی ئەندازیارانی کۆمپانیاکە جەخت لەسەر ئەوە دەکەنەوە کە لە ئەنجامی هەڵەیەکەوە بووە لە بەشی گۆڕینی ئامادەکارییەکانی تایبەت بە سیستمەکە کە بەرپرسە لە ئاراستەکردنی بنەڕەتی تۆڕەکە و هەماهەنگیکردن لە نێوان ئینتەرنێت و ناوەندەکانی تۆمارکردنی زانیارییەکان لە کۆمپانیای فەیسبووک.

بەمەش دەردەکەوێت، کە ئەو هەواڵەی لەبارەی هاکكەرە تەمەن ١٣ ساڵە چینییەکەوە بڵاوکراوەتەوە دورە لە راستییەوە و شتێکی لەو جۆرە بوونی نییە.

ئەمە لەکاتێکدایە، کاتژمێر ٦:٥٠ خولەکی ئێوارەی رابردوو بەشێک لە تۆڕەکۆمەڵایەتییە جیهانییەکان لەکارکەوتن و لەناویشیاندا فەیسبووک و واتس ئەپ و ئینستاگرام بوونی هەبوو.

رۆژنامەی نیۆرک تایمزی ئەمەریکی بڵاویکردەوە، دوو ئەندامی تیمی ئاسایشی فەیسبوک کە نەیانویستووە ناوەکانیان ئاشکرابکرێت رایانگەیاندووە، "لەکارکەوتنی ئەپڵیکەیشنەکە بۆ هێرشی ئەلیکترۆنیی و هاککردن ناگەڕێتەوە، هاوکات بەهۆی تەکنەلۆژیاکانی ئەپڵیکەیشنەکەشەوە، بەیەکجاری ئەپڵیکەیشنەکە لەکارنەکەوتووە".

کـ ، ئـ