بەگوێرەی ماڵپەرەکە، روکاری پارچە ڤاکسینەکە بە دەرزی کورت ئاژنین کراوە و لەسەر روی دەرەوەی پێست دادەنرێت و ڤاکسینەکە دەچێتە ژێر پێستەوە، هاوشیوەی ڤاکسینە باوەکان نییە لە رێگەی دەرزییەوە بنێردرێتە ناو قوڵایی پێستەوە و ئازاریشی هەبێت.

یەکێک لە تایبەتمەندێتییەکانی دیکەی ڤاکسینەکە ئەوەیە، هەموو کەس دەتوانێت بۆخۆی بەکاری بهێنێت و چی دیکە پێویست ناکات سەردانی نەخۆشخانە و پزیشک و پەرستار بکرێت تا ڤاکسینەکە وەربگیرێت.

ڤاکسینەکە راستەوخۆ لە نزیک خانە بەرگرییەکانی پێستەوە وەردەگیرێت و بەگوێرەی ماڵپەری سایەنس ئەلێرت کاریگەرییەکەی ٥٠ هێندەی ڤاکسینە باوەکان زیاترە.

ئەو لەزگەیەی ڤاکسینەکەی پێوەردەگیرێت لە رێگەی تەکنەلۆجیای سێ دوورییەوە دروستکراوە و پێیدەوترێت continuous liquid interface" production" بەرهەمهێنانی روکاری شلەمەنی بەردەوام و بەهۆی بەکارهێنانی تیشکی سەروبنەوشەییەوە قەبارە و دوری نێوان دەرزییەکان دەستنیشان کراون.

تیمی توێژەرەوە و ئامادەکاری ڤاکسینەکە ئاماژەیان بەوەشداوە، دەکرێت ڤاکسینەکە بەشێوازێک دیزاین بکرێت بتوانرێت بۆ پێدانی ڤاکسینەکانی ئەنفلۆنزا و دڕکە و مێکوتە و هەوکردنی جگەر و تەنانەت بۆ کۆرۆناش بەکاربهێنرێت.

جۆزیف دیسیمۆن، ئەندازیاری کیمیایی لە زانکۆی ستانفۆرد رایگەیاند، "لەڕێگەی ئەم پەرەپێدانەوە دەتوانین لەمەودوا بەکەمترین تێچوون و کەمترین ژەمە ڤاکسین و ئازارێکی کەمتر و رێگەیەکی خێراتر بنەمایەکی جیهانی بۆ پەرەپێدانی ڤاکسینەکان داڕێژین".

ئاماژەی بەوەشداوە، لە ئێستادا هێشتا بۆ بەکارهێنانی ڤاکسینەکە بۆ مرۆڤ پێویستی بە تاقیکردنەوەی زیاترهەیە و ئاسانیش نییە بەشێوەیەکی فراوان بڕێکی زۆر بەردەست بخرێت.

کـ، ئـ