سەردێڕ:

پارە براوەکانى عێراق لەم سێ وڵاتە دەگەڕێنرێنەوە

PM:04:22:29/09/2021

9808 جار خوێندراوەتەوە

وەزارەتی دادی عێراق رایگەیاند، بەگوێرەی بنەمای مامەڵەکردنی هاوشێوە، حکومەتی فیدڕاڵی بەنیازە رێککەوتنێک لەگەڵ ئەردەن و میسر و سویسرا واژۆبکات بەمەبەستی گێڕانەوەی بەشێک لەو پارەیەی براوەتە دەرەوەی وڵات و لەو وڵاتانە بلۆک کراون.


ئەمڕۆ چوارشەممە، ئەحمەد لعێبی وتەبێژی وەزارەتی دادی عێراق بە میدیا ناوخۆییەکانی راگەیاند، حکومەتی فیدڕاڵی بەنیازە رێککەوتنامەیەک لەگەڵ هەریەک لە ئەردەن و میسر و سویسرادا واژۆ بکات.

ئاماژەی بەوەشدا، رێککەوتنەکە بەمەبەستی گێڕانەوەی بەشێک لەو پارانەیە کە لەماوەی دەسەڵاتدارێتی سەدام حسێن بەناوی کەسایەتییە هەواڵگرییەکانی ئەوکاتی حکومەتەوە براونەتە دەرەوە و لە ئێستادا دەستیان بەسەرداگیراوە و بلۆک کراون.

ئەحمەد لعێبی وتیشی، لەرێگەی بەرزکردنەوەی سکاڵاوە لە نوسینگەکانی وەزارەتی داد و سندوقی گێڕانەوەی سامانە براوەکان لە دەستەی دەستپاکییەوە هەوڵدەدرێت پارەکە بگەڕێنرێتەوە و لایەنە هەرێمی و نێودەوڵەتییەکانیش خوازیاری چالاککردن و بەگەڕخستنی ئەو رێککەوتنامانەن.

ئەوەشی خستەڕوو، لە ئێستادا هیچ ئامارێکی ورد و دروست لەبەردەستدانییە لەبارەی بڕی تەواوی ئەو پارانەی براوەتە دەرەوەی وڵات. دەشڵێت، " قەبارەی پارە براوەکان بۆ دەرەوەی وڵات نزیکەی ١٨٠ بۆ ٣٥٠ ملیار دۆلار دەبێت".

ئەمە لەکاتێکدایە، لەناوەڕاستی ئەم مانگەدا، حکومەتی عێراق بە ئامادەبوونی کۆمکاری وڵاتانی عەرەبی و ژمارەیەک لە وەزیرانی دادی ئەو وڵاتانە کۆنگرەیەکی لە بارەی گێڕانەوەی پارە براوەکانی بۆ دەرەوەی وڵات و دەستبەسەراگرتنیان سازکرد و تیایدا لەبارەی واژۆکردنی چەند گرێبەست و رێککەوتنامەوە لەگەڵ لایەنە پەیوەندیدارەکان گفتوگۆکرا.


کـ ، ئـ








گەلەری