ئەوەشی خستەڕوو، گرفتی گەورە سیستمی وەرگرتنی خوێندکارە لە زانکۆ، کە تەنها پێوەر تێکڕا نمرەی خوێندکار لە پۆلی ١٢یە.

دەشڵێت، لیژنەیەکیان هەیە بە سەرپەرشتی بریکاری وەزیر، بۆ داڕشتنەوە و پێداچوونەوەی یاسا لە خوێندنی باڵا، بەشێوەیەک کە لەسەر بنەمای گۆڕانکارییە سیاسی و ئابوری و پێشکەوتنە زانستییەکانی ناوچەکە و جیهان بێت.

ئارام محەمەد قادر ئاماژەی بەوەشدا، مەبەستییانە لە یاسای نوێی خوێندندا دەستەبەری سەربەخۆیی ئەکادیمیی و زانستی بۆ کارگێڕی و دارایی زانکۆکانی هەرێمی کوردستان بکات، چونکە زانکۆ بەبێ سەربەخۆیی ئیداریی و ئەکادیمی ناتوانێت لەسەر پێی خۆی بوەستێ و ناتوانێت ببێتە ناوەندێکی ئەکادیمی راستەقینە.

وەزیری خوێندنی باڵا و توێژینەوەی زانستی هەرێم باسی لەوەشکرد، هەتا سیستمی وەرگرتنی خوێندکار لە زانکۆکاندا نەگۆڕدرێت ناتوانن بەهیچ گۆڕانکارییەک دڵخۆشبن، چونکە توانا و باکگراوندی زانستی خوێندکار بەهەند وەرناگرێت.

لەبارەی کەرتی تایبەتەوە ئاشکرای کرد، "نابێ ترسمان لە فراوانکردنی خوێندنی پیشەیی و تایبەت هەبێت لە هەرێمی کوردستان، ئەو سەرمایەدارە نیشتمانیانەی لە کە ناوەندەکانی خوێندن تەنها چاویان لە قازانجی مادیی نییە پێویستە پشتگیری بکرێن، بۆ ئەوەی خوێندنی پیشەیی لە ناوەندەکانی تایبەت و حکومی بەرفراوان بکرێت".

وتیشی، زانکۆ حکومییەکان بارگرانییان بۆ حکومەت دروست کردووە، لە جیهانی مۆدێرندا ئەوان سەربەخۆن.