کۆشکی سپی رایگەیاند، ٢٦ی تەموز سەرۆک وەزیرانی عێراق سەردانی واشنتۆن دەکات و لەلایەن سەرۆکی ئەمریکاوە پێشوازی لێدەکریت. دەشڵێت، "ئامانج لەسەردانەکە جەختکردنەوەیە لەسەر هاوبەشی ستراتیجی نێوان ئەو دوو وڵاتە".
کۆشکی سپی رایگەیاند، ٢٦ی تەموز سەرۆک
وەزیرانی عێراق سەردانی واشنتۆن دەکات و لەلایەن سەرۆکی ئەمریکاوە پێشوازی
لێدەکریت. دەشڵێت، "ئامانج لەسەردانەکە جەختکردنەوەیە لەسەر هاوبەشی ستراتیجی
نێوان ئەو دوو وڵاتە".
کۆشکی سپی ئەمریکا راگەیەنراوێکی
بڵاوکردەوە و تیایدا هاتووە، بەمەبەستی جەختکردنەوە لەسەر هاوبەشی ستراتیجی نێوان
ئەمریکا و عێراق، ٢٦ی تەموز، مستەفا کازمی سەرۆکوەزیرانی عێراق بە سەردانێکی فەرمی
دەگاتە واشنتۆن.
ئاماژەی بەوەشداوە، جۆ بایدن سەرۆکی
ئەمریکا لە کۆشکی سپی پێشوازی لە مستەفا کازمی و شاندی یاوەریدەکات.
راگەیەنراوەکە ئەوەشی خستووەتەڕوو، جۆ
بایدن لەبارەی بەهێزکردنی پەیوەندییەکانی نێوان دوو وڵات لە بوارەکانی سیاسی و
ئابوری و ئەمنی بەگشتی و هەوڵی هاوبەش بۆ
تێکشکاندنی داعش بەتایبەتی لەگەڵ مستەفا کازمی گفتوگۆدەکات.
پێشبیندەکرێت، لە گفتوگۆی ستراتیجی نێوان
واشنتۆن و بەغدا، کازمی
خشتەیەکی ماوە درێژ دابنێت بۆ کشانەوەی هێزەکانی ئەمریکا لەعێراق، کە لە ئێستادا نزیکەی
سێ هەزار و ٥٠٠ سەربازی ئەمریکی لەناو عێرقدا ماون.
ئەمە لەکاتێکدایە، لە ٧ی نیسانی ئەمساڵ
لەبارەی کشانەوەی هێزەکانی ئەمریکا لە عێراق و روبەڕووبونەوەی داعش و بەهێزکردنی پەیوەندییە سیاسییەکان و ئابورییەکان و دۆسییەکانی
ئاڵوگۆڕی کەلتوری و تەندروستی و ژینگە و
پەروەردە و وزە گرفتوگۆی ستراتیجی نێوان ئەمریکا و عێراق بەڕێوەچوو.
لە ١٥ى ئەم مانگەش
برێت مەکگۆرک رێکخەری ئەنجوومەنی ئاسایشی نیشتیمانیی ئەمەریکا بۆ کاروباری رۆژھەڵاتی
ناوەڕاست و باکوری ئەفریقا لەگەڵ سەرۆکایەتییەکانى عێراق کۆبووەوە و باسى لە کشانەوەى
هێزەکانى ئەمریکا لەو وڵاتە و ئامادەکارییەکانى هەڵبژاردن کرد.
لە ئێستادا نزیکەی سێ هەزار و ٥٠٠ سەربازی
ئەمریکی لە عێراقدا ماونەتەوە. لەماوەی رابردووشدا نزیکەی ٥٠ هێرش لە رێگەی فڕۆکەی
بێفڕۆکەوان و ئاراستەکردنی موشەک کراوەتە سەر بنکە سەربازیەکانی ئەمریکا لە عێراق
و فڕۆکەخانەی نێودەوڵەتی بەغدا و هەولێر، ئەمریکاش حەشدی شەعبی و گروپە
چەکدارەکانی نزیک لە ئێرانەوە بە ئەنجامدانی هێرشەکان تۆمەتباردەکات.
لە کۆتایی مانگی حوزەیران ئەمریکا هێرشێکی
بۆ سەر هێزەکانی حەشدی شەعبی لە سنوری نێوان سوریا و عێراق ئەنجامدا و بەهۆیەوە
نزیکەی ١٠ چەکداری حەشد کوژران.