سەردێڕ:

بەهۆی رووداوی هاتوچۆوە؛ منداڵێکی ٢٠ رۆژە و ژنێکی دیکە گیانیان لەدەستدا

PM:10:15:16/09/2021

12992 جار خوێندراوەتەوە

لە دوو رووداوی جیاوازی هاتوچۆ لە پارێزگای دهۆک ژنێک و منداڵێکی تەمەن ٢٠ رۆژ گیانیان لەدەستدا و دایکی منداڵەکەش برینداربوو.


ئەمڕۆ پێنجشەممە، بەگوێرەی زانیارییەکانی پەیامنێری ئێن ئاڕ تی لە پارێزگای دهۆک ژنێک بە مەبەستی خوازبێنی کردن بۆ یەکێک لە خزمە نزیکەکانی دەچێتە دەرەوە و کاتێک دەگاتە سەر یەکێک لە شەقامەکان ئۆتۆمبێلێک لێیداوە و گیانی لەدەستداوە.

هەر ئەمڕۆ، ئۆتۆمبێلێکی بارهەڵگر لە ژنێک دەدات کە منداڵێکی تەمەن ٢٠ رۆژەی لەباوەشدادەبێت، بە هۆیەوە منداڵەکە دەست بەجێ گیانی لەدەستداوە و دایکیشی بە سەخی برینداربووە.

بەگوێرەی ئامارەکانی هاتوچۆی هەرێمی کوردستان، لە حەوت مانگی سەرەتای ئەمساڵدا دوو هەزار و ٢٨٧ رووداوی هاتوچۆ روویانداوە، کە تیایدا ٣١٦ کەس گیانیان لەدەستداوە و سێ هەزار و ٩٩١ کەسیش برینداربوون.

رووداوەکانی هاتوچۆ بە یەکێک لە هۆکارە سەرەکییەکانی گیان لەدەستدان و برینداربوون یان کەمئەندامبوون دادەنرێت لە هەرێم، کە بەشێکی پەیوەندی بە خراپی رێگاوبان و کوالێتی رێگاوبانەکانەوە هەیە و بەشێکیشیان پەیوەندی بە پابەندنەبوونی شۆفێران بە خێرایی دیارکراو و رێنماییەکانی هاتوچۆوە هەیە.

كـ. ئـ








گەلەری