سەردێڕ:

وادەى لێدانى لۆگۆ و لەزگەى تەکسى درێژکرایەوە

AM:08:56:16/09/2021

11724 جار خوێندراوەتەوە

وەزیرى گواستنەوە و گەیاندنى حکومەتى هەرێمى کوردستان رایگەیاند "بەهەماهەنگى لەگەڵ وەزارەتى ناوخۆ لە هەوڵى دریژکردنەوەى ماوەى لێدانى لۆگۆ و لەزگەى تەکسیدان".


وەزارەتى گواستنەوە و گەیاندنى حکومەتى هەرێمى کوردستان لە راگەیەندراوێکدا ئاماژەى بەوە کرد "لەمیانەى پێشوازیکردنى لە نوێنەرى سەندیکاى کرێکاران و شۆفێرانى تەکسى، ئانۆ جەوهەر وەزیرى گواستنەوە و گەیاندن جەختى لەسەر ئەوە کردەوە کە ماوەى لێدانى لۆگۆ و لەزگەى تەکسى دریژدەکرێتەوە و بۆ ئەو بابەتە لەگەڵ وەزارەتى ناوخۆ لەسەر هێڵن".

بەگوێرەى راگەیەندراوەکە، وەزیرى گواستنەوە و گەیاندن داواى لە شۆفێرانى تاکسى کردووە کە پابەندبن بە لێدانى لۆگۆ و کارتى زانیارى تەکسى بۆ ئەوەى دووچارى سزاى یاسایى نەبن.

ئەمە لەکاتێکدایە کە بڕیار بوو دوا وادە بۆ لێدانى لەزگەى تەکسى رۆژى ١ى١١ى ٢٠٢١ بێت و سزاى پابەندنەبوونیش بڕى ٥٠٠ هەزار دینار بوو.

پێشتر دیلان رەشاد وتەبێژی وەزارەتی گواستنەوە و گەیاندنی هەرێم بە ئێن ئاڕ تی رایگەیاند، هەر شۆفێری تەکسییەک لە رۆژی ١ی تشرینی دووەم لۆگۆ و لەزگەی نەدابێت لە ئۆتۆمبێلەکەی سزادەدرێت.

دیلان رەشاد باسی لەوەشکردووە، سزاکە بڕی ٥٠٠ هەزار دینارە بۆ هەر مانگێک، بەجۆرێک بۆ هەر مانگێک دواکەوتن لە تۆمارکردن و لێدانی لۆگۆ و لەزگە بەبڕی ٥٠٠ هەزار دینار سزادەدرێن.

لە ٢٩ی تەمموزی ئەمساڵدا، وەزارەتی گواستنەوە و گەیاندن نوسراوێکی ئاڕاستەی وەزارەتی ناوخۆی هەرێم کرد بە ئامانجی درێژکردنەوەی ماوەی لێدانی لۆگۆ و لەزگەی ئۆتۆمبێلەکابی تەکسی لە هەرێمی کوردستاندا تاوەکو ١ی تشرینی دووەمی ئەمساڵ، بەهۆی ئەوەی لەو کاتەدا ژمارەیەکی زۆر تەکسی نەیانتوانیوە خۆیان تۆمار بکەن.








گەلەری